ឯកឧត្តម ឡេង ប៉េងឡុង អគ្គលេខាធិការរដ្ឋសភា បានអនុញ្ញាតឲ្យនិស្សិតអាហារូបករណ៍ ដែលជាមន្ត្រីនៃអគ្គលេខាធិការដ្ឋានរដ្ឋសភា នៃសាធារណរដ្ឋប្រជាធិបតេយ្យប្រជាមានិតឡាវ ចំនួន០៣រូប ដែលបានទទួលអាហារូបករណ៍តាមរយៈក្រុមមិត្តភាពរដ្ឋសភាកម្ពុជា ឡាវ សិក្សានៅសាកលវិទ្យាល័យប៊ែលធី ចូលជួបសំណេះសំណាល និងសំដែងការគួរសម នារសៀលថ្ងៃទី១៣ ខែតុលា ឆ្នាំ២០២១ នៅវិមាន រដ្ឋសភា។
ឯកឧត្តម ឡេង ប៉េងឡុង បានមានប្រសាសន៍ឲ្យដឹងថា តាមរយៈក្រុមមិត្តភាពរដ្ឋសភាកម្ពុជា ឡាវ បានផ្តល់អាហារូបករណ៍ដល់មន្ត្រី នៃអគ្គលេខាធិការដ្ឋានរដ្ឋសភា នៃសាធារណរដ្ឋប្រជាធិបតេយ្យប្រជាមានិតឡាវ ក្នុងគោលបំណងរឹតចំណងសាមគ្គីភាព និងកិច្ចសហ- ប្រតិបត្តិការ រវាងស្ថាប័នរដ្ឋសភានៃប្រទេសទាំងពីរ ក៏ដូចជាការជួយគ្នាទៅវិញទៅមកនៅលើឆាកអន្តរជាតិ។
ឯកឧត្តមបានលើកឡើងពីប្រវត្តិសាស្ត្រជាច្រើនដែលទាក់ទងទៅនឹងប្រទេសទាំងពីរ ពិសេសគឺលើកយកកិច្ចសហការគ្នា ក្នុងការចូលរួម ដេញរបបអាណានិគមនិយមបារាំង និងការចូលរួមជួយគ្នាជាបន្តបន្ទាប់លើឆាកនយោបាយអន្តរជាតិ នាពេលកន្លងទៅ ក្នុងនាមជាបងប្អូន ញាតិមិត្ត ដែលមានភូមិផងរបងជាប់គ្នា។
ឯកឧត្តមអគ្គលេខាធិការរដ្ឋសភា មានសង្ឃឹមយ៉ាងមុតមាំ និងជឿជាក់ថា នៅពេលខាងមុខប្រទេសយើងទាំងពីរកម្ពុជា ឡាវ នឹងសម្បូរ ធនធានមនុស្សលើគ្រប់វិស័យទាំងអស់ សម្រាប់ចូលរួមចំណែក ក្នុងការអភិវឌ្ឍប្រទេស ឲ្យមានភាពជឿនលឿន និងដើរទាន់បណ្តា ប្រទេសនានាលើសកលលោក។
នៅចុងបញ្ចប់ ឯកឧត្តមបានជូនពរដល់និស្សិតអាហារូបករណ៍ទាំងបីរូប សូមទទួលបានជោគជ័យ និងយកចំណេះដឹងទាំងអស់ ដែលខ្លួន មាន យកទៅចូលរួមចំណែកក្នុងការកសាង អភិវឌ្ឍន៍ប្រទេសឲ្យកាន់តែមានភាពសម្បូររុងរឿងថែមទៀត៕
អត្ថបទ និងរូបភាព ដោយនាយកដ្ឋានព័ត៌មាន