ឯកឧត្តមកិត្តិនីតិកោសលបណ្ឌិត ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌នៃរដ្ឋសភា បានលើកពីសក្តានុពលវិនិយោគ វឌ្ឍនភាពនៃកំណើនសេដ្ឋកិច្ចជាតិ និងកិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការលើកស្ទួយបរិយាកាសធុរកិច្ច វិនិយោគ និងកិច្ច សម្រួលពាណិជ្ជកម្មនៅក្នុងប្រទេសកម្ពុជាដល់គណៈប្រតិភូធុរកិច្ចចិន ដឹកនាំដោយ ឯកឧត្តម វ័ន យៀកហ្វី អនុប្រធាន និងជាលេខា បក្សនៃគណៈកម្មាធិការអចិន្រ្តៃយ៍នៃសភាប្រជាជនតំបន់ស្វយ័តជនជាតិជាំងក្វាងស៊ី។

នៅក្នុងជំនួបពិភាក្សាការងារ នៅរសៀលថ្ងៃទី២២ ខែតុលា ឆ្នាំ២០១៩នេះ នៅវិមានរដ្ឋសភា ឯកឧត្តមកិត្តិនីតិកោសលបណ្ឌិត ប៉ែន បញ្ញា បានសម្ដែងនូវកិច្ចស្វាគមន៍យ៉ាងកក់ក្តៅ និងវាយតម្លៃខ្ពស់ចំពោះការចំណាយពេលវេលារបស់គណៈប្រតិភូ ធ្វើដំណើរមកកម្ពុជា ដើម្បី ស្វែងយល់ដោយផ្ទាល់ពីកាលានុវត្តភាពវិនិយោគនៅកម្ពុជា។

ឯកឧត្តមបានលើកឡើងផងដែរ អំពីកំណែទម្រង់ និងវិធានការសំខាន់ៗរបស់ប្រមុខរាជរដ្ឋាភិបាលកម្ពុជា ដើម្បីជួយសម្រួលប្រតិបត្តិការ ធុរកិច្ចរបស់ផ្នែកឯកជន សំដៅពង្រឹងឯករាជ្យភាព និងឧត្តមភាពប្រកួតប្រជែងរបស់កម្ពុជានៅលើឆាកអន្តរជាតិ។ ជាពិសេសទាក់ទាញ ការបណ្តាក់ទុនថ្មីៗពីបរទេស លើវិស័យសំខាន់ៗដែលបានកំណត់នៅក្នុងយុទ្ធសាស្ត្រចតុកោណ ដំណាក់កាលទី៤។

ឯកឧត្តមបានគូសបញ្ជាក់ថា កម្ពុជាស្វាគមន៍គ្រប់អ្នកវិនិយោគបរទេស មិនថាប្រទេសចិន សហគមន៍អឺរ៉ុបទេ កម្ពុជាស្វាគមន៍រាល់ ការវិនិយោគបរទេសទាំងអស់។ ឯកឧត្តមបានលើកឡើងថា តាមរយៈគោលនយោបាយ ខ្សែក្រវ៉ាត់មួយផ្លូវមួយ រាជរដ្ឋាភិបាលកម្ពុជា និងរដ្ឋាភិបាលប្រជាជនចិន បានជំរុញឲ្យមានការអភិវឌ្ឍលើគ្រប់វិស័យ ហើយបានលើកកម្ពស់កំណើនសេដ្ឋកិច្ចជាតិបានល្អប្រសើរ។

ឯកឧត្តម វ័ន យៀកហ្វី បានមានប្រសាសន៍ថា អ្នកវិនិយោគមកពីចិននេះ គឺមានបំណងចង់ស្វែងយល់ពីឱកាសវិនិយោគនៅកម្ពុជា ស្របពេលដែលប្រទេសកម្ពុជា និងប្រទេសចិន មានចំណងទំនាក់ទំនងល្អជាមួយគ្នាស្រាប់។ ឯកឧត្តម បានគូសបញ្ជាក់ថា គោលនយោបាយដែលប្រទេសចិនបានបង្កើតឡើង មិនបានគិតផលប្រយោជន៍ចិនតែមួយនោះទេ គឺគិតដល់ផលប្រយោជន៍រួមជា ផលប្រយោជន៍អាស៊ាន និងពិភពលោក។

ទាំង ឯកឧត្តមកិត្តិនីតិកោសលបណ្ឌិត ប៉ែន បញ្ញា និង ឯកឧត្តម វ័ន យៀកហ្វី បានសម្តែងនូវមោទនភាពចំពោះកិច្ចប្រឹងប្រែងរួមគ្នានៃ ប្រទេសកម្ពុជា និងចិន ដែលបានធ្វើឲ្យទំនាក់ទំនងមិត្តភាពជាប្រពៃណីនៃប្រទេសទំាងពីរ មានភាពល្អប្រសើរជាងពេលណាៗទំាងអស់ ៕

អត្ថបទ និងរូបភាព ដោយនាយកដ្ឋានព័ត៌មាន