វិមានរដ្ឋសភា៖ ឯកឧត្តមបណ្ឌិត កែវ ពិសិដ្ឋ អគ្គលេខាធិការរងប្រចាំការរដ្ឋសភា និងជានាយកខុទ្ទកាល័យសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នារសៀលថ្ងៃទី១៤ ខែតុលា ឆ្នាំ២០២៦ បានអញ្ជើញដឹកនាំកិច្ចប្រជុំពិនិត្យ និងតាមដានវឌ្ឍនភាព ការងារ នៃការរៀបចំសិក្ខាសាលាពិគ្រោះយោបល់ ស្តីពី «ការអភិវឌ្ឍសភាអេឡិចត្រូនិក (e-Parliament)» នៅវិមានរដ្ឋសភា។
កិច្ចប្រជុំដ៏មានសារៈសំខាន់នេះ មានការអញ្ជើញចូលរួមពីសំណាក់ ឯកឧត្តម លោកជំទាវ ជាប្រធាននាយកដ្ឋាន អនុប្រធាននាយកដ្ឋាន ព្រមទាំងមន្ត្រីរាជការ និងភាគីពាក់ព័ន្ធជាច្រើនរូប។
អង្គប្រជុំបានធ្វើការពិភាក្សា និងពិនិត្យយ៉ាងល្អិតល្អន់លើកម្មវិធីសិក្ខាសាលា និងលទ្ធផលការងារ ដែលសម្រេចបាននាពេលកន្លងមក ព្រមទាំងរៀបចំផែនការបន្តដើម្បីធានាឱ្យការរៀបចំសិក្ខាសាលាពិគ្រោះយោបល់ស្តីពីការអភិវឌ្ឍសភាអេឡិចត្រូនិច (e-Parliament) នេះ ប្រព្រឹត្តទៅដោយរលូន ប្រកបដោយប្រសិទ្ធភាពខ្ពស់ និងទទួលបានលទ្ធផលជាផ្លែផ្កា ស្របតាមទិសដៅនៃការធ្វើទំនើបកម្មស្ថាប័នរដ្ឋសភាឱ្យក្លាយជា «សភា ឌីជីថល»។
សូមជម្រាបថា៖សិក្ខាសាលាពិគ្រោះយោបល់ស្តីពី «ការអភិវឌ្ឍសភាអេឡិចត្រូនិច(e-Parliament) នឹងប្រព្រឹត្តទៅនាព្រឹកថ្ងៃទី១៩ ខែតុលា ឆ្នាំ២០២៦ នៅវិមានរដ្ឋសភា ក្រោមអធិបតីភាពដ៏ខ្ពង់ខ្ពស់របស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា និងមានការអញ្ជើញចូលរួមពីសំណាក់សមាជិក សមាជិការដ្ឋសភាជាង១០០រូប។
សម្តេចប្រធានរដ្ឋសភា នឹងអញ្ជើញថ្លែងបើកសិក្ខាសាលាដ៍សំខាន់នេះ ខណៈអគ្គលេខាធិការ និងអគ្គលេខាធិការរងនៃរដ្ឋសភា នឹងអញ្ជើញថ្លែងសុន្ទរកថាស្វាគមន៍ និងរបាយការណ៍អំពីវឌ្ឍនភាពនៃការរៀបចំសភាអេឡិចត្រូនិក។
ជាងនេះទៅទៀត សិក្ខាសាលានឹងមានបទបង្ហាញទាក់ទងនឹងច្បាប់និងបទដ្ឋានគតិយុត្តសភាអេឡិចត្រូនិក, កម្មវិធីទូរស័ព្ទដៃរបស់រដ្ឋសភាNAC Apps និងគេហទំព័រថ្មីរបស់រដ្ឋសភា ជាពិសេសការចែករំលែកបទពិសោធពីប្រទេសជាសមាជិកសហភាពអន្តរសភា(IPU) និងសភាបារាំងអំពីសភាឌីជីថល ៕
