រាជធានីភ្នំពេញ៖ លោកជំទាវ កុល ធារិន សមាជិកាគណៈកម្មការ សេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា (គណៈកម្មការទី២) និងជាតំណាងរាស្ត្រមណ្ឌលខេត្តកំពង់ចាម នាព្រឹកថ្ងៃទី១៤ ខែតុលា ឆ្នាំ២០២៦ បានអញ្ជើញចូលរួមគោរពវិញ្ញាណក្ខន្ធសព ឯកឧត្តមបណ្ឌិត ហ៊ីវ សុវណ្ណ រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ។
ក្នុងឱកាសដ៏ក្រៀមក្រំនេះ លោកជំទាវ តំណាងរាស្ត្រ បានសម្តែងនូវសេចក្តីអាឡោះអាល័យ និងសោកស្តាយជាពន់ពេក ចំពោះការបាត់បង់ ឯកឧត្តមបណ្ឌិត ហ៊ីវ សុវណ្ណ ដែលជាឥស្សរជនដ៏សំខាន់មួយរូប ធ្លាប់បានលះបង់កម្លាំងកាយចិត្ត និងប្រាជ្ញាស្មារតី ក្នុងការបម្រើជាតិ សាសនា ព្រះមហាក្សត្រ ជាពិសេសការចូលរួមចំណែកយ៉ាងសកម្មក្នុងវិស័យសេដ្ឋកិច្ច និងហិរញ្ញវត្ថុសាធារណៈនាពេលកន្លងមក។
សូមរំលឹកផងដែរថា ឯកឧត្តមបណ្ឌិត ហ៊ីវ សុវណ្ណ បានទទួលមរណភាពកាលពីថ្ងៃទី៨ ខែតុលា ឆ្នាំ២០២៦ វេលាម៉ោង ១៥:៣០នាទីរសៀល ក្នុងជន្មាយុ ៧៦ឆ្នាំ ដោយរោគាពាធ។
បច្ចុប្បន្ន កម្មវិធីបុណ្យសពត្រូវបានរៀបចំធ្វើឡើងតាមប្រពៃណី និងសាសនា ស្ថិតនៅក្នុងវត្តលង្កាកុសុមារាម សង្កាត់បឹងកេងកងទី១ ខណ្ឌចំការមន រាជធានីភ្នំពេញ៕