|
ថ្នាក់ដឹកនាំរដ្ឋសភារៀបចំពិធីលៀងសាយភោជន៍ ទទួលស្វាគមន៍គណៈប្រតិភូសភា តំណាងប្រជាជនចិនក្រុងសៀងហៃ ក្នុងអំឡុងពេលទស្សនកិច្ចនៅ ព្រះរាជាណាចក្រកម្ពុជា
|
|
Prepaired By:
NA002
Date: (9/3/2024 8:06:24 PM
) |
|
|
នៅសណ្ឋាគារ Rosewood ជាន់ទី 36 នៃអគារវឌ្ឍនៈ នារាត្រីថ្ងៃទី៣ ខែកញ្ញា ឆ្នាំ២០២៤ ឯកឧត្តម វង សូត អនុប្រធានទី២រដ្ឋសភា បានរៀបចំពិធីលៀងសាយភោជន៍ទទួលស្វាគមន៍គណៈប្រតិភូសភាតំណាងប្រជាជនចិនក្រុងសៀងហៃ ដឹកនាំដោយ លោកជំទាវ ចុង មីង (Zong Ming) អនុប្រធានគណៈកម្មាធិការអចិន្ត្រៃយ៍សភាតំណាងប្រជាជនចិនក្រុងសៀងហៃ ក្នុងអំឡុងពេលអញ្ជើញមកទស្សនកិច្ចនៅព្រះរាជាណាចក្រកម្ពុជា រយៈពេល៣ថ្ងៃ ពីថ្ងៃទី២ ដល់ ថ្ងៃទី៤ ខែកញ្ញា ឆ្នាំ២០២៤។
ថ្លែងក្នុងពិធីលៀងសាយភោជន៍នារាត្រីនេះ ក្នុងនាមសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា និងក្នុងនាមឯកឧត្តមផ្ទាល់ ឯកឧត្តមមានសេចក្តីសោមនស្ស រីករាយ សូមសម្តែងនូវកិច្ចស្វាគមន៍យ៉ាងកក់ក្តៅបំផុត ចំពោះវត្តមាន របស់គណៈកម្មាធិការអចិន្ត្រៃយ៍នៃសភាប្រជាជនក្រុងសៀងហៃ ដឹកនាំដោយលោកជំទាវ ចុង មីង ដែលបានអញ្ជើញមកបំពេញទស្សនកិច្ច នៅព្រះរាជាណាចក្រកម្ពុជា នាពេលនេះ គឺស្របពេលដែល ប្រទេសយើងទាំងពីរ កំពុងអបអរសាទរខួបលើកទី៦៦ឆ្នាំ នៃការបង្កើត ទំនាក់ទំនងការទូតរវាងចិន-កម្ពុជា ដែលមានការរីកចម្រើនយ៉ាងខ្លាំង ពីដៃគូយុទ្ធសាស្ត្រ ទៅជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តភាព ដែកថែប រួមគ្នាកសាងសហគមន៍វាសនារួមប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់ និងបង្កើតនូវក្របខណ្ឌកិច្ចសហប្រតិបត្តិការ ត្បូងពេជ្រ។
ឯកឧត្តមអនុប្រធានទី២រដ្ឋសភា បានវាយតម្លៃខ្ពស់ចំពោះលទ្ធផលដ៏ល្អប្រសើរ កើតចេញពីកិច្ចប្រជុំទ្វេភាគីរវាង សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងលោកជំទាវ ចុង មីង (Zong Ming) អនុប្រធានគណៈកម្មាធិការអចិន្ត្រៃយ៍សភាតំណាងប្រជាជនចិនក្រុងសៀងហៃ
និងជំនួបពិភាក្សាការងារជាមួយគណៈកម្មការជំនាញនៃរដ្ឋសភា ដែលបានឆ្លុះបញ្ចាំងឱ្យឃើញពីការប្តេជ្ញាចិត្តយ៉ាងមោះមុតក្នុងការបន្តលើកកម្ពស់ ពង្រឹង និងពង្រីកនូវកិច្ចសហប្រតិបត្តិការទ្វេភាគី និងពហុភាគី ក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ រវាងប្រទេសទាំងពីរ និងរវាងស្ថាប័ននីតិប្បញ្ញត្តិទាំងពីរ ក្នុងការគាំទ្រគ្នាទៅវិញទៅមក សំដៅនាំមកនូវផលប្រយោជន៍រួមនៃប្រទេសទាំងសងខាង។
ក្នុងឱកាសនេះដែរ លោកជំទាវ ចុង មីង (Zong Ming) បានសម្តែងនូវក្តីរំភើបរីករាយ និងថ្លែងអំណរគុណដល់រដ្ឋសភាកម្ពុជាចំពោះបដិសណ្ឋារកិច្ចដ៏កក់ក្តៅនេះ។ លោកជំទាវ បានលើកសរសើរពីប្រវត្តិសាស្រ្តកម្ពុជាដែលមានជាយូរលុងណាស់មកហើយ ជាមួយនឹងទេសភាពដ៏ស្រស់ត្រកាលគ្រប់ទីកន្លែង។ លោកជំទាវ បានវាយតម្លៃខ្ពស់ចំពោះការរីកចម្រើនរបស់កម្ពុជា ដោយបានកត់សម្គាល់នូវការខិតខំរបស់រាជរដ្ឋាភិបាលកម្ពុជាក្នុងការរក្សាបាននូវស្ថិរភាពនយោបាយ ការងើបឡើងវិញនូវកំណើនសេដ្ឋកិច្ច នាំឱ្យជីវភាពប្រជាជនមានលំនឹង និងកើនឡើងជាលំដាប់។ លោកជំទាវ បានគូសបញ្ជាក់ពីចំណងមិត្តភាពកម្ពុជា-ចិន ដែលមានជាយូរអង្វែងមកហើយ នឹងកំពុងប្រែក្លាយជាគំរូនៃទំនាក់ទំនងជាអន្តរជាតិក្នុងសម័យថ្មី។ លោកជំទាវ បានគាំទ្រនូវប្រសាសន៍លើកឡើងដោយ ឯកឧត្តម ដែលក្រោមការដឹកនាំប្រកបដោយគតិបណ្ឌិតរបស់ថ្នាក់ដឹកនាំប្រទេសទាំងពីរ ភាពជាដៃគូយុទ្ធសាស្ត្រគ្រប់ជ្រុងជ្រោយរបស់ប្រទេសទាំងពីរបានឈានដល់ដំណាក់កាលថ្មីនៃការកសាងសហគមន៍វាសនារួមកម្ពុជា-ចិន ប្រកបដោយគុណភាពខ្ពស់ កម្រិតខ្ពស់ និងស្ដង់ដារខ្ពស់។
ជារួម ថ្នាក់ដឹកនាំស្ថាប័ននីតិប្បញ្ញត្តិ នៃប្រទេសទាំងពីរបានបេ្តជ្ញាចិត្តក្នុងការបន្តពង្រឹង និងពង្រីកចំណងមិត្តភាព ទំនាក់ទំនងនិងកិច្ចសហប្រតិបត្តិការទ្វេភាគីរវាងប្រទេសទាំងពីរ ឱ្យកាន់តែរឹងមាំ និងល្អប្រសើរឡើងថែមទៀត នាពេលអនាគត សម្រាប់ជាប្រយោជន៍ដល់ប្រទេស និងប្រជាជនទាំងពីរកម្ពុជា-ចិន។
ចុងក្រោយ លោកជំទាវ ចុង មីង សង្ឃឹមថាកម្ពុជា-ចិន នឹងជំរុញឱ្យមានជើងហោះហើរត្រង់ពីខេត្តសៀមរាប ឬទីក្រុងភ្នំពេញ ទៅកាន់ក្រុងសៀងហៃ រួមទាំងការផ្តល់អំណោយផលលើផ្នែកទិដ្ឋាការ ដើម្បីជំរុញវិស័យទេសចរណ៍រវាងប្រទេសទាំងពីរ ហើយលោកជំទាវក៏បានអញ្ជើញគណៈប្រតិភូសភាកម្ពុជា ទៅទស្សនកិច្ចនៅទីក្រុងសៀងហៃក្នុងពេលវេលាសមរម្យណាមួយនាពេលខាងមុខផងដែរ៕
|
|