ខេត្តកំពត៖ ក្រោយពីបញ្ចប់ដំណើរទស្សនកិច្ចនៅមណ្ឌលសុខភាពអង្គភ្នំតូច និងមន្ទីរពេទ្យអនុស្សាវរីយ៍ស៊ុនយ៉ាឃៀលរួចមក នារសៀលថ្ងៃទី១២ ខែសីហា ឆ្នាំ២០២៦ ឯកឧត្តមបណ្ឌិត ម៉ៅ ធនិន អភិបាលនៃគណៈអភិបាលខេត្តកំពតបានរៀបចំពិធីទទួលស្វាគមន៍ និងជប់លៀងជូនគណៈប្រតិភូសមាជិកសភាអាស៊ី-ប៉ាស៊ីហ្វិក ដែលបានអញ្ជើញមកចូលរួមវេទិកា សមាជិកសភាអាស៊ី-ប៉ាស៊ីហ្វ៊ិកស្តីពីសុខភាពសកល លើកទី៩ (9th APPF-GH) ដែលរដ្ឋសភាកម្ពុជារៀបចំធ្វើម្ចាស់ផ្ទះ។
ពិធីនេះត្រូវបានរៀបចំឡើងក្នុងបរិយាកាសប្រកបដោយភាពស្និទ្ធស្នាល រួសរាយរាក់ទាក់ និងមិត្តភាព ដើម្បីបង្ហាញពីការស្វាគមន៍យ៉ាងកក់ក្តៅរបស់កម្ពុជា ចំពោះបណ្តាគណៈប្រតិភូ សមាជិកសភាអាស៊ី-ប៉ាស៊ីហ្វ៊ិក ដែលបានអញ្ជើញមកចូលរួមកិច្ចប្រជុំដ៏មានសារៈសំខាន់នេះ។
ក្នុងឱកាសនោះ ឯកឧត្តមបណ្ឌិត ម៉ៅ ធនិន បានសម្តែងនូវសេចក្តីសោមនស្សរីករាយ និងថ្លែងអំណរគុណចំពោះវត្តមានរបស់គណៈប្រតិភូទាំងអស់ ដែលបានចំណាយពេលវេលាអញ្ជើញមកកាន់ព្រះរាជាណាចក្រកម្ពុជា។ ការជួបជុំក្នុងឱកាសនេះ ក៏ជាវេទិកាមួយសម្រាប់បង្កើនចំណងមិត្តភាព សាមគ្គីភាព និងកិច្ចសហប្រតិបត្តិការរវាងសមាជិកសភានៃបណ្តាប្រទេសក្នុងតំបន់អាស៊ី-ប៉ាស៊ីហ្វ៊ិក។
គណៈប្រតិភូបានសម្តែងនូវការអរគុណ ចំពោះការទទួលស្វាគមន៍យ៉ាងកក់ក្តៅ និងការរៀបចំដ៏ល្អប្រសើររបស់គណៈអភិបាលខេត្តព្រមទាំង បានបង្ហាញនូវការកោតសរសើរចំពោះសម្រស់ធម្មជាតិ វប្បធម៌ ប្រពៃណី និងបដិសណ្ឋារកិច្ចដ៏ល្អរបស់ប្រជាជនកម្ពុជា។
