វិមានរដ្ឋសភា៖ ឯកឧត្តម វង សូត អនុប្រធានទី២រដ្ឋសភា តំណាងដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានផ្តល់អនុសាសន៍ណែនាំ និងជំរុញលើកទឹកចិត្តឱ្យនិស្សិតជ័យ លាភីអាហារូបករណ៍ទៅសិក្សានៅសាធារណរដ្ឋឆែក និងប្រទេសជប៉ុន បំពេញតួនាទីជា «ទូតសុច្ឆន្ទៈ» តំណាងឱ្យប្រទេសជាតិ ដោយត្រូវចូលរួមផ្សព្វផ្សាយពីវប្បធម៌ ប្រវត្តិសាស្ត្រ និងសក្តានុពលពិតរបស់ កម្ពុជា ទៅកាន់ពិភពលោក។
ការថ្លែងសំណេះសំណាល និងផ្តល់អនុសាសន៍នេះ ធ្វើឡើងក្នុងឱកាស ដែល ឯកឧត្តម អនុប្រធានទី២រដ្ឋសភា អនុញ្ញាតអោយនិស្សិតជ័យលាភីអាហារូបករណ៍ទៅឆែក និងជប៉ុនសម្រាប់ឆ្នាំសិក្សា ២០២៦-២០២៧ សរុបចំនួន ៤២រូប ចូលជួបសម្តែងការគួរសម និងទទួលអនុសាសន៍ មុនចេញដំណើរទៅបន្តការសិក្សាថ្នាក់ក្រោយឧត្តមសិក្សានៅបរទេស។
នាឱកាសនោះ ឯកឧត្តម វង សូត បានសង្កត់ធ្ងន់ថា ធនធានមនុស្សគឺជាគ្រឹះយ៉ាងសំខាន់ក្នុងការអភិវឌ្ឍប្រទេសជាតិឱ្យរឹងមាំ ហើយឱកាសអាហារូបករណ៍ទាំងនេះ មិនត្រឹមតែកើតចេញពីការខិតខំរបស់និស្សិតប៉ុណ្ណោះទេ ប៉ុន្តែក៏ជាផ្លែផ្កានៃកិច្ចខិតខំប្រឹងប្រែងរបស់រាជរដ្ឋាភិបាល ក្នុងការពង្រឹងកិច្ចសហប្រតិបត្តិការយ៉ាងជិតស្និទ្ធជាមួយប្រទេសជាដៃគូផងដែរ។ ឯកឧត្តមបានស្នើឱ្យនិស្សិតទាំងអស់ប្រកាន់ខ្ជាប់នូវសាមគ្គីភាព ភាពថ្លៃថ្នូរ និងស្មារតីទទួលខុសត្រូវខ្ពស់ ដោយនាំយកចំណេះដឹង និងបទពិសោធន៍ ត្រឡប់មកវិនិយោគលើការអភិវឌ្ឍជាតិវិញ។
តំណាងនិស្សិតបានសម្តែងនូវការដឹងគុណ និងប្តេជ្ញាចិត្តយ៉ាងមុតមាំថា នឹងខិតខំប្រឹងប្រែងក្រេបជញ្ជក់ចំណេះដឹងឱ្យអស់ពីសមត្ថភាព ដើម្បីវិលត្រឡប់មកបម្រើមាតុភូមិវិញ។ គួររំលឹកផងដែរថា គិតមកដល់ពេលបច្ចុប្បន្ន រដ្ឋាភិបាលឆែកបានផ្តល់អាហារូបករណ៍ដល់និស្សិតកម្ពុជាជាង ៤០០នាក់ ខណៈកម្មវិធី JDS របស់ជប៉ុន បានគាំទ្រនិស្សិត និងមន្ត្រីរាជការកម្ពុជាបានសរុបចំនួន ៦២១រូប គិតចាប់តាំងពីឆ្នាំ២០០០មក៕
