ឯកឧត្តម ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា បានអញ្ជើញដឹកនាំ គណៈប្រតិភូរដ្ឋសភាកម្ពុជា ទៅបំពេញទស្សនកិច្ចជាផ្លូវការនិងមិត្តភាព នៅសាធារណរដ្ឋប្រជាមានិតចិន ចាប់ពីថ្ងៃទី២១ ដល់ថ្ងៃទី២៧ ខែកុម្ភៈ ឆ្នាំ២០១៩ នៅសាធារណរដ្ឋប្រជាមានិតចិន។

គណៈប្រតិភូសភាកម្ពុជា បានចាកចេញពីប្រទេសកម្ពុជា នៅព្រឹកថ្ងៃទី២១ ខែកុម្ភៈនេះ តាមជើងយន្តហោះ។  នៅក្នុងដំណើរទស្សនកិច្ចនេះ គណៈប្រតិភូរដ្ឋសភាកម្ពុជា ដឹកនាំដោយ ឯកឧត្តម ឈាង វុន គ្រោងនឹងជួបពិភាក្សាការងារជាមួយ អនុប្រធានគណៈកម្មការកិច្ចការបរទេស នៃរដ្ឋសភាតំណាង ប្រជាជនចិននៅទីក្រុងប៉េកាំង។ ជួបពិភាក្សាការងារជាមួយថ្នាក់ដឹកនាំខេត្ត និងសភាខេត្ត Guangzhou។

ដំណើរទស្សនកិច្ចរបស់គណៈប្រតិភូគណៈកម្មការជំនាញរដ្ឋសភាកម្ពុជានៅប្រទេសចិននេះ ក្នុងគោលបំណង ពង្រឹងពង្រីកកិច្ចសហប្រតិបត្តិការរវាង សភា រដ្ឋាភិបាល និងប្រជាជន នៃប្រទេសទាំងពីរអោយកាន់តែរឹងមាំថែមទៀត។

ឯកឧត្តម ឈាង វុន បានលើកឡើងថា ទំនាក់ទំនងកម្ពុជា ចិន ជាទំនាក់ទំនងអ្នកជិតខាងល្អ ជាបងប្អូន មិត្តភ័ក្តិជិតស្និទ្ធ គោរព យោគយល់ និងគំាទ្រគ្នា ទៅវិញទៅមក។ ដំណើរទស្សនកិច្ច គណៈប្រតិភូរដ្ឋសភាកម្ពុជា នៅប្រទេសចិននាពេលនេះ នឹងបង្កើនកិច្ចសហប្រតិបត្តិការបន្ថែមទៀត រវាងស្ថាប័ន នីតិប្បញ្ញត្តិ និងនីតិប្រតិបត្តិ នៃប្រទេសទាំងពីរ ដែលរឹងមាំស្រាប់ ឱ្យកាន់តែគ្រប់ជ្រុងជ្រោយ នៅគ្រប់កម្រិត៕

អត្ថបទ និងរូបភាព ដោយនាយកដ្ឋានព័ត៌មាន