រដ្ឋសភានៃព្រះរាជាណាចក្រកម្ពុជា បានរៀបចំពិធីទទួលបដិណ្ឋារកិច្ចជាផ្លូវការយ៉ាងកក់ក្តៅជាទីបំផុត ស្វាគមន៍ដំណើរទស្សនកិច្ចជាផ្លូវការនិងមិត្តភាពរបស់ ឯកឧត្តម ត្រិន ថាញ់ មិន (Tran Thanh Man) ប្រធានរដ្ឋសភា នៃសាធារណរដ្ឋសង្គមនិយមវៀតណាម ព្រមទំាងសមាជិកគណៈប្រតិភូទំាងអស់ នៅវិមានរដ្ឋសភា នារសៀលថ្ងៃថ្ងៃទី២១ ខែវិច្ឆិកា ឆ្នាំ២០២៤។

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ព្រមទំាងថ្នាក់ដឹកនាំ សមាជិកសមាជិការដ្ឋសភា និងថ្នាក់ដឹកនាំអគ្គលេខាធិការដ្ឋានរដ្ឋសភា រួមនិងមន្រ្តីអគ្គលេខាធិការដ្ឋានរដ្ឋសភាជាច្រើននាក់ទៀត បានអញ្ជើញធ្វើគារវកិច្ចយ៉ាងកក់ក្តៅជាទីបំផុតជូនចំពោះគណៈប្រតិភូជាន់ខ្ពស់រដ្ឋសភាវៀតណាម។  ពិធីបដិសណ្ឋារកិច្ចស្វាគមន៍ បានប្រព្រឹត្តទៅក្នុងបរិយាកាសរីករាយ និងស្និទ្ធស្នាល ដោយមានពិធីគោរពភ្លេងជាតិនៃប្រទេសទំាងពីរ ត្រែទ័ព និងត្រួតពល។