ឯកឧត្តមបណ្ឌិត កែវ ពិសិដ្ឋ  អគ្គលេខាធិការរងរដ្ឋសភាប្រចាំការ និងជានាយកខុទ្ទកាល័យសម្តេច មហារដ្ឋសភាធិការធិបតី ឃួន សុដារី ប្រធានរដ្ឋសភា នារសៀលថ្ងៃទី៨ ខែកញ្ញា ឆ្នាំ២០២៥ បាន អញ្ជើញដឹកនាំកិច្ចប្រជុំនៅវិមានរដ្ឋសភា ជាមួយក្រុមការងារដែលមានភារកិច្ច ទៅបម្រើការងារជូន គណៈប្រតិភូ ជាន់ខ្ពស់សភាកម្ពុជា ដែលនឹងត្រូវទៅចូលរួមមហាសនិ្នបាតអន្តរសភាអាស៊ាន (អាយប៉ា/AIPA) លើកទី៤៦។ 

កិច្ចប្រជុំធ្វើឡើងក្នុងគោលបំណងដើម្បីពិនិត្យមើលវឌ្ឍនភាពក្នុងការកសាងឯកសារ ពិធីការ និងការងារព័ត៌មាន ពិសេស ការទំនាក់ទំនងជាមួយម្ចាស់ផ្ទះរៀបចំមហាសន្និបាត ធ្វើយ៉ាងណាឱ្យការចូលរួមរបស់គណៈប្រតិភូចូលរួមមហាសន្និបាតអាយប៉ាលើកទី៤៦នេះដំណើរទៅដោយរលួន ទទួលបានជោគជ័យ នាំមកនូវផលប្រយោជន៍ជូនពលរដ្ឋនិងប្រទេសជាតិ។ 

សូមបញ្ជាក់ថា មហាសន្និបាតអន្តរសភាអាស៊ាន ជាព្រឹត្តិការណ៍ដ៏សំខាន់ដែលថ្នាក់ដឹកនាំអង្គនីតិប្បញ្ញត្តិ នៃប្រទេសជាសមាជិកអាស៊ាន មកជួបប្រជុំគ្នាជារៀងរាល់ឆ្នាំ។មហាសន្និបាតអន្តរសភាអាស៊ាន លើក ទី ៤៦នេះ នឹងប្រារព្ធឡើងពីថ្ងៃ១៦ ដល់ថ្ងៃទី២២ ខែកញ្ញា ឆ្នាំ២០២៥ ខាងមុខនេះ នៅប្រទេសម៉ាឡេស៊ី។

គណៈប្រតិភូជាន់ខ្ពស់សភាកម្ពុជាដែលនឹងត្រូវចូលរួមមហាសន្និបាតនេះដឹកនាំដោយសម្តេចមហារដ្ឋសភាធិការធិបតី ឃួន សុដារី ប្រធាន រដ្ឋសភានៃព្រះរាជាណាចក្រកម្ពុជា៕