គណៈប្រតិភូគណៈកម្មការសិទ្ធិមនុស្ស ទទួលពាក្យបណ្តឹងនិងអង្កេត និងអធិការកិច្ច នៃរដ្ឋសភា (គណៈកម្មការទី១) ដឹកនាំដោយ ឯកឧត្តម សរ ចំរុង ប្រធានគណៈកម្មការ នារសៀលថ្ងៃទី៨ ខែកញ្ញា ឆ្នាំ២០២៥ បានអញ្ជើញចុះសួរសុខទុក្ខកងទ័ពជួរមុខដែលរងរបួសចំនួន ១៨នាក់ ដែលកំពុងសម្រាកព្យាបាលជំងឺនៅមន្ទីរពេទ្យបង្អែកខេត្តសៀមរាប។
នៅក្នុងឱកាសនោះ ឯកឧត្តម សរ ចំរុង បាននាំនូវការផ្តាំផ្ញើរសាកសួរសុខទុក្ខ ក្តីនឹករលឹក និងការគិតគូរគ្រប់ពលវេលាពីសំណាក់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ជូនដល់បងប្អូនកងទ័ពទាំងអស់ ព្រមទាំងបានជូនពរឱ្យវីរយុទ្ធជនទាំងអស់ មានសុខភាពល្អ និងឆាប់ជាសះស្បើយ ដើម្បីបានទៅបម្រើជាតិមាតុភូមិ ។

ជាមួយគ្នានេះ ឯកឧត្តម សរ ចំរុង បានបញ្ជាក់ពីទឹកចិត្តគោរពកោតសរសើរ និងដឹងគុណដល់វីរភាពកងទ័ព ដែលបានតស៊ូលះបង់សាច់ស្រស់ ឈាមស្រស់ ដើម្បីបុព្វហេតុការពារបូរណភាពទឹកដី និងសុខសន្តិភាពជូនជាតិ និងប្រជាជន ព្រមទាំងសម្តែងនូវអំណរគុណក្រុមគ្រូពេទ្យ និងបុគ្គលិកសុខាភិបាលទាំងអស់ ដែលបានកំពុងបំពេញនាទីជាកងទ័ពអាវសជួរក្រោយដោយឈរលើសាមគ្គីភាពជាធ្លុងមួយ យកចិត្តទុកដាក់មិនរាថយ បម្រើការថែទាំព្យាបាលអ្នកជំងឺគ្រប់ស្ថានការណ៍ ប្រកបដោយវិជ្ជាជីវៈ និងសេចក្តីស្រឡាញ់។

ក្នុងឱកាសនោះដែរ ឯកឧត្តម បានប្រគល់នូវសម្ភារៈប្រើប្រាស់ជូនដល់វីរកងទ័ពទាំង ១៨នាក់ ក្នុងម្នាក់ៗទទួលបាន៖ ភួយចំនួន១ ក្រមាចំនួន១ ត្រីងៀត និងសាច់ក្រក ព្រមទាំងថវិកាចំនួន ២០០.០០០ រៀល និងឧបត្ថម្ភមន្ទីរពេទ្យបង្អែកខេត្ត ថវិកាចំនួន ១.០០០.០០០រៀល៕