សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា កាលពីរាត្រីថ្ងៃទី២០ ខែសីហា ឆ្នាំ២០២៦ម្សិលមិញនេះ បានអញ្ជើញជាភ្ញៀវកិត្តិយសដ៏ខ្ពង់ខ្ពស់ ក្នុងពិធីជប់លៀងអបអរសាទរខួបអនុស្សាវរីយ៍លើកទី៨១ នៃទិវាបុណ្យជាតិ នៃសាធារណរដ្ឋសង្គមនិយមវៀតណាម ដែលរៀបចំឡើងដោយស្ថានទូតវៀតណាមប្រចាំកម្ពុជា នៅសណ្ឋាគារសូហ្វីតែល ភ្នំពេញ ភូគីត្រា។
វត្តមានដ៏ឧត្តុង្គឧត្តមរបស់សម្តេចប្រធានរដ្ឋសភានាឱកាសនេះ បានឆ្លុះបញ្ចាំងយ៉ាងច្បាស់ពីការប្តេជ្ញាចិត្តយ៉ាងមុតមាំក្នុងការបន្តពូនជ្រំទំនាក់ទំនង និងពង្រឹងទំនុកចិត្តនយោបាយកម្រិតខ្ពស់ ស្របតាមបាវចនា «ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង» ដើម្បីឧត្តមប្រយោជន៍ និងវឌ្ឍនភាពរួមនៃប្រជាជាតិទាំងពីរ កម្ពុជា-វៀតណាម៕