រាជធានីភ្នំពេញ៖ នាល្ងាចថ្ងៃទី១២ ខែសីហា ឆ្នាំ២០២៦ អង្គការសុខភាពពិភពលោក (WHO) បានរៀបចំពិធីជប់លៀងស្វាគមន៍ជូនគណៈប្រតិភូជាន់ខ្ពស់ និងសមាជិក សមាជិកា ដែលបានអញ្ជើញមកពីបណ្តាប្រទេសក្នុងតំបន់អាស៊ី-ប៉ាស៊ីហ្វិក ដើម្បីចូលរួមក្នុង «វេទិកាសមាជិកសភាអាស៊ី-ប៉ាស៊ីហ្វិកស្តីពីសុខភាពសកល លើកទី៩» (9th APPF-GH) នៅសណ្ឋាគារហៃយ៉ាត់ រាជធានីភ្នំពេញ។
ពិធីនេះត្រូវបានរៀបចំឡើងក្នុងបរិយាកាសស្និទ្ធស្នាល និងប្រកបដោយភាពរីករាយ ដើម្បីស្វាគមន៍គណៈប្រតិភូ និងជាការបង្ហាញពីការយកចិត្តទុកដាក់របស់អង្គការសុខភាពពិភពលោកចំពោះការពង្រឹងកិច្ចសហប្រតិបត្តិការជាមួយសភានៃបណ្តាប្រទេសក្នុងតំបន់ លើវិស័យសុខភាពសកល។
ក្នុងឱកាសនោះ គណៈប្រតិភូបានជួបសំណេះសំណាល និងផ្លាស់ប្តូរមតិយោបល់គ្នាក្នុងបរិយាកាសរួសរាយរាក់ទាក់ ព្រមទាំងបានបង្កើនទំនាក់ទំនង និងមិត្តភាពរវាងសមាជិកសភា អ្នកជំនាញសុខាភិបាល និងតំណាងអង្គការអន្តរជាតិ ដែលបានអញ្ជើញចូលរួមក្នុងវេទិកាដ៏មានសារៈសំខាន់នេះ។
វេទិកា សមាជិកសភាអាស៊ី-ប៉ាស៊ីហ្វិក (9th APPF-GH )ត្រូវបានរៀបចំឡើងនៅរាជធានីភ្នំពេញ ចាប់ពីថ្ងៃទី១១ ដល់ថ្ងៃទី១៣ ខែសីហា ឆ្នាំ២០២៦ ក្រោមប្រធានបទពាក់ព័ន្ធនឹងការជំរុញការគ្របដណ្តប់សុខភាពជាសកល (UHC) ដោយផ្តោតលើប្រព័ន្ធសុខាភិបាលដែលធន់នឹងការប្រែប្រួលអាកាសធាតុ និងការប្រើប្រាស់បញ្ញាសិប្បនិម្មិត (AI) ក្នុងវិស័យសុខាភិបាល។
ពិធីជប់លៀងនេះ ក៏ជាឱកាសដ៏ល្អមួយក្នុងការរឹតបន្តឹងចំណងមិត្តភាព សាមគ្គីភាព និងកិច្ចសហប្រតិបត្តិការរវាងសភានៃបណ្តាប្រទេសអាស៊ី-ប៉ាស៊ីហ្វិក និងអង្គការសុខភាពពិភពលោក ដើម្បីរួមគ្នាជំរុញការអភិវឌ្ឍវិស័យសុខាភិបាល និងលើកកម្ពស់សុខុមាលភាពប្រជាពលរដ្ឋក្នុងតំបន់ ៕