តំណាងរាស្ត្រមណ្ឌលខេត្តកំពង់ឆ្នាំង រួមមាន លោកជំទាវ កែ ច័ន្ទមុន្នី ឯកឧត្ដម ឡុង ឈុនឡៃ  លោកជំទាវ កុប ម៉ារីយ៉ាស និងឯកឧត្តមបណ្ឌិត ហ៊ឺ វីរៈ នាថ្ងៃទី៣ ខែកញ្ញា ឆ្នាំ២០២៥ បានអញ្ជើញចូលរួមជាគណៈអធិបតីក្នុងកម្មវិធីសំណេះសំណាលជាមួយពលករដែលបានវិលត្រឡប់មកពីប្រទេសថៃ និងគ្រួសារកងទ័ពជួរមុខ ។

កម្មវិធីនេះប្រារព្ធធ្វើឡើងនៅស្រុកកំពង់លែង ខេត្តកំពង់ឆ្នាំង ក្រោមអធិបតីភាពឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រីទទួលបន្ទុកបេសកកម្មពិសេសប្រធានក្រុមប្រឹក្សាជាតិ ស្តារវិស័យកសិកម្មនិងអភិវឌ្ឍន៍ ជនបទនិងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង។
ពិធីនេះមានការចែកជូនអំណោយជូនដល់គ្រួសារកងទ័ពចំនួន ៤៤ នាក់និងប្រជាពលករដែលបានវិលត្រឡប់មកពីប្រទេសថៃចំនួន ៣៧១ នាក់។ 

ក្នុងឱកាសនោះ ឯកឧត្ដមបណ្ឌិតសភាចារ្យ បាននាំនូវប្រសាស ន៍ផ្តាំផ្ញើសួរសុខទុក្ខដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនដល់បងប្អូនប្រជាពលករ និងគ្រួសារវីរកងទ័ពទាំងអស់ ដោយសម្តេច និងថ្នាក់ដឹកនាំតែងតែគិតគូរសុខទុក្ខរបស់បងប្អូនគ្រប់ពេលវេលា។ 

ឯកឧត្តមបណ្ឌិតសភាចារ្យ ក៏បានផ្តាំផ្ញើដល់គ្រួសារពលករ និងគ្រួសារវីរកងទ័ព ត្រូវតែជឿជាក់លើការសម្រេចចិត្តដឹកនាំរបស់ថ្នាក់ដឹកនាំប្រទេសនិងណែនាំឱ្យបងប្អូន ដែលពុំមានការងារធ្វើសូមប្រញាប់ រួសរាន់ទំនាក់ទំនងទៅអាជ្ញាធរមូលដ្ឋានដើម្បីជួយសម្របសម្រួលស្វែងរកការងារជូនឱ្យបានគ្រប់ៗគ្នា៕