ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិនិងព័ត៌មាននៃរដ្ឋសភា នាព្រឹកថ្ងៃទី៩ ខែមិថុនា ឆ្នាំ២០២៥ បានទទួលជួបពិភាក្សាការងារជាមួយលោកជំទាវបណ្ឌិត LAIMA LIUCIJA ANDRIKIENE សមាជិក នៃតុលាការសវនករអឺរ៉ុប នៅវិមានរដ្ឋសភា ក្នុងខណៈពេលដែលលោកជំទាវនិងសហការីមកទស្សនកិច្ចនៅកម្ពុជាដើម្បីសិក្សាវាយតម្លៃសេដ្ឋកិច្ច ប្រសិទ្ធភាពនៃសកម្មភាពរបស់សហភាពអឺរ៉ុប ក្នុងគោលបំណងបង្កើនគណនេយ្យភាព តម្លាភាព និងការគ្រប់គ្រងហិរញ្ញវត្ថុរបស់សហភាពអឺរ៉ុប។
ឯកឧត្តម សួស យ៉ារ៉ា បានសម្តែងការស្វាគមចំពោះដំណើរទស្សនកិច្ចរបស់លោកជំទាវបណ្ឌិត និងកិច្ចសហប្រតិបត្តិការរបស់សហភាពអឺរ៉ុបនៅកម្ពុជាដែលបានគាំទ្រដល់ការស្តារនិងកសាងសង្គម និងសេដ្ឋកិច្ចរបស់កម្ពុជារហូតមកទល់បច្ចុប្បន្ន។ឯកឧត្តមក៏បានជម្រាបជូនអំពីតួនាទីកម្ពុជានៅក្នុងតំបន់មេគង្គនិងអាស៊ាននិងការប្រកាន់ខ្ជាប់នូវសាមគ្គីភាព និងមជ្ឈតភាពអាស៊ាន ដែលបើកចំហចំពោះកិច្ចសហប្រតិបត្តិការជាមួយនឹងប្រទេសក្នុងតំបន់និងប្រទេសដៃគូ និងបានវាយតម្លៃខ្ពស់ចំពោះសហប្រតិបត្តិការរវាងតំបន់អាស៊ាន និងអឺរ៉ុប ជាពិសេសទាំងក្របខណ្ឌសហភាពអឺរ៉ុប និងអាស៊ាន និងសភាអឺរ៉ុប និងអន្តរសភាអាស៊ាន (AIPA)។
សូមគោរពជម្រាបជូនថា ឯកឧត្តម សួស យ៉ារ៉ា នឹងដឹកនាំគណ:ប្រតិភូរដ្ឋសភាកម្ពុជា ទៅចូលរួមកិច្ចប្រជុំលើកទី៥ រវាងរដ្ឋសភាកម្ពុជា និងសភាអឺរ៉ុប ដែលនឹងប្រព្រឹត្តទៅ នៅខែកក្កដា ឆ្នាំ២០២៥ នៅទីក្រុង Strasburg ប្រទេសបារាំង៕