វិមានរដ្ឋសភា៖ ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរងរដ្ឋសភា និងជាប្រធានក្រុមទីប្រឹក្សា របស់រដ្ឋសភា កាលពីថ្ងៃព្រហស្បតិ៍ទី ១៣ ខែ សីហា បានអញ្ជើញធ្វើបទបឋកថាស្តីពី «ការទូតសភាក្នុងពិភពលោកពហុប៉ូល»ជូន មន្ត្រីចំនួន ៣០រូប មកពីនាយកដ្ឋានពាក់ព័ន្ធនៃអគ្គលេខាធិការដ្ឋានរដ្ឋសភា ដើម្បីស្វែងយល់អំពីទស្សនាទាន និងសារៈសំខាន់នៃការទូតសភា តួនាទីនៃការទូតសភាក្នុងទំនាក់ទំនងអន្តរជាតិ ព្រមទាំងការចូលរួមចំណែកក្នុងការដោះស្រាយបញ្ហាប្រឈម និងការទាញយកកាលានុវត្តភាពនៅក្នុងពិភពលោកពហុប៉ូលដែលកំពុងមានការប្រែប្រួល។

ឯកឧត្តមបណ្ឌិត ឈាង វណ្ណារិទ្ធ បានពន្យល់ថា ការទូតសភាបានបំពេញបន្ថែមឱ្យការទូតរាជរដ្ឋាភិបាលនិងរដ្ឋាភិបាល តាមរយៈការបង្កើតច្រកបន្ថែមសម្រាប់ការសន្ទនា កិច្ចសហប្រតិបត្តិការ និងការ   កសាងទំនុកចិត្ត ព្រមទាំងបានឆ្លុះបញ្ចាំងពីសំឡេង ផលប្រយោជន៍ និងសេចក្តីប្រាថ្នារបស់ប្រជាពលរដ្ឋនៅក្នុងកិច្ចការអន្តរជាតិ។

ឯកឧត្តមបានមានប្រសាសន៍បន្ថែមថា តាមរយៈការចូលរួមទ្វេភាគី និងពហុភាគី ការទូតសភាអាចពង្រឹងទំនាក់ទំនងជាមួយសភាបណ្តាប្រទេសនានា លើកកម្ពស់ការយល់ដឹងកាន់តែទូលំទូលាយអំពី   កម្ពុជា និងកសាងការគាំទ្រពីអន្តរជាតិសម្រាប់ប្រទេសជាតិ។

ឯកឧត្តមបានកត់សម្គាល់ថា៖ «ការទូតសភារបស់កម្ពុជាបានក្លាយជាកម្លាំងចលករកាន់តែសកម្ម និងបុរេសកម្ម ក្នុងការឆ្លើយតបទៅនឹងបរិយាកាសអន្តរជាតិដែលកំពុងប្រែប្រួលយ៉ាងឆាប់រហ័ស ជួយបើកទ្វារស្វាគមន៍ដៃគូសំខាន់ៗ ពង្រឹងកិច្ចសហប្រតិបត្តិការ និងបង្កើតកាលានុវត្តភាពថ្មីៗ ជាពិសេសក្នុងវិស័យសេដ្ឋកិច្ច»។

ក្រោមការដឹកនាំដ៏ខ្ពង់ខ្ពស់របស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ការទូតសភាទទួលបានការយកចិត្តទុកដាក់កាន់តែខ្លាំង ដែលជាឧបករណ៍ដ៏មានសារៈសំខាន់ក្នុងការលើកកម្ពស់ផលប្រយោជន៍ជាតិកម្ពុជា ពង្រឹងកិច្ចសហប្រតិបត្តិការអន្តរជាតិ និងរួមចំណែកដល់សន្តិភាពស្ថិរភាព និងវិបុលភាពរួម។

បទបឋកថានេះ ក៏បានគ្របដណ្តប់លើទិសដៅការទូតទៅអនាគតរបស់កម្ពុជា ស្ថានភាពព្រំដែនបច្ចុប្បន្នជាមួយប្រទេសថៃ ទំនុកចិត្តរបស់សាធារណជនលើរាជរដ្ឋាភិបាល និងតួនាទីរបស់សភាក្នុងការផ្សព្វផ្សាយជំហររបស់កម្ពុជាទៅកាន់សហគមន៍អន្តរជាតិផងដែរ។

ឯកឧត្តមបណ្ឌិត ឈាង វណ្ណារិទ្ធ បានសង្កត់ធ្ងន់លើភាពចាំបាច់ក្នុងការពង្រឹងសមត្ថភាពទប់ស្កាត់របស់កម្ពុជា ប្រឆាំងនឹងការគំរាមកំហែងដល់សន្តិសុខជាតិ។ ឯកឧត្តមក៏បានលើកទឹកចិត្តឱ្យបង្កើនការប្រើប្រាស់ការទូតសភា ដើម្បីបង្ហាញពីទស្សនទាន និងតថភាពជាក់ស្តែងរបស់កម្ពុជាទៅកាន់សហគមន៍អន្តរជាតិឱ្យបានច្បាស់លាស់។

ឯកឧត្តមបានគូសបញ្ជាក់បន្ថែមថា ភាពរឹងមាំរបស់កម្ពុជានាពេលអនាគត គឺផ្អែកលើកំណែទម្រង់ផ្ទៃក្នុង និងការពង្រឹងសមត្ថភាពជាតិឱ្យកាន់តែរឹងមាំ។ កត្តានេះទាមទារឱ្យមានការវិនិយោគលើមូលធនមនុស្ស ការពង្រឹងសមត្ថភាពបុគ្គលនិងស្ថាប័ន ព្រមទាំងការធ្វើទំនើបកម្មស្ថាប័នសាធារណៈឱ្យកាន់តែមានតម្លាភាព ប្រសិទ្ធភាព និងការឆ្លើយតបខ្ពស់ ដើម្បីរក្សាបាននូវជំនឿទុកចិត្ត និងទំនុកចិត្តពីសាធារណជន។

បទបឋកថានេះ ត្រូវបានបិទបញ្ចប់ដោយបានរំលេចនូវតួនាទីដ៏សំខាន់នៃការទូតសភា ក្នុងការលើកកម្ពស់សន្តិភាព និងវិបុលភាព បង្កើនការទទួលស្គាល់និងមុខមាត់វិជ្ជមានរបស់កម្ពុជាលើឆាកអន្តរជាតិ ព្រមទាំងការកសាងការយល់ដឹង និងការគាំទ្រពីអន្តរជាតិឱ្យកាន់តែទូលំទូលាយ។

ជាថ្មីម្តងទៀត ឯកឧត្តមបណ្ឌិត ឈាង វណ្ណារិទ្ធ បានគូសបញ្ជាក់ឡើងវិញថា ការពង្រឹងសមត្ថភាពជាតិជារួម និងសមត្ថភាពទប់ស្កាត់វិបត្តិ គឺជារឿងមិនអាចខ្វះបានឡើយ ក្នុងការការពារផលប្រយោជន៍របស់ប្រទេសជាតិ នៅក្នុងបរិបទអន្តរជាតិដែលកាន់តែស្មុគស្មាញ។