ខេត្តព្រះសីហនុ៖ ឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន (គណៈកម្មការទី៤) នៃរដ្ឋសភា នាល្ងាចថ្ងៃទី២០ ខែសីហា ឆ្នាំ២០២៦ បានអញ្ជើញចូលរួមពិធីលៀងសាយភោជន៍ ដែលរៀបចំឡើងនៅលើនាវាកងទ័ពជើងទឹកអង់គ្លេស HMS TAMAR (P233) នៅមូលដ្ឋានសមុទ្ររាម ក្រោមអធិបតីភាពដ៏ខ្ពង់ខ្ពស់របស់ នាយឧត្តមសេនីយ៍ ទៀ វិញ រដ្ឋលេខាធិការ ក្រសួង ការពារជាតិ។
នាវាល្បាតឈូងសមុទ្រ HMS TAMAR បានចូលចតនៅមូលដ្ឋានសមុទ្ររាម នាវេលាម៉ោង១០ព្រឹក ថ្ងៃទី២០ ខែសីហា ឆ្នាំ២០២៦។ ដំណើរទស្សនកិច្ចនេះ គឺជាលើកដំបូងរបស់នាវា HMS TAMAR មកកាន់មូលដ្ឋាន សមុទ្ររាម និងជាដំណើរទស្សនកិច្ចលើកទី៣ របស់កងទ័ពជើងទឹកអង់គ្លេស មកកាន់កម្ពុជា ចាប់តាំងពីឆ្នាំ២០២៣។
ក្នុងអំឡុងពេលទស្សនកិច្ចចាប់ពីថ្ងៃទី២០ ដល់ថ្ងៃទី២៧ ខែសីហា ឆ្នាំ២០២៦ នាវា HMS TAMAR នឹងធ្វើ សកម្មភាពហ្វឹកហ្វឺនរួមជាមួយកងទ័ពជើងទឹកកម្ពុជា ដើម្បីពង្រឹងកិច្ចសហប្រតិបត្តិការផ្នែកការពារជាតិ ការផ្លាស់ប្តូរចំណេះដឹង និងជំនាញវិជ្ជាជីវៈ ព្រមទាំងជំរុញកិច្ចសហប្រតិបត្តិការសន្តិសុខដែន សមុទ្រក្នុងតំបន់ ឥណ្ឌូ-ប៉ាស៊ីហ្វ៊ិក។
ដំណើរទស្សនកិច្ចនេះបានបង្ហាញពីការរីកចម្រើននៃទំនាក់ទំនង និងកិច្ចសហប្រតិបត្តិការរវាងកម្ពុជា និងចក្រភពអង់គ្លេស ជាពិសេសក្នុងវិស័យការពារជាតិ និងសន្តិសុខដែនសមុទ្រ ព្រមទាំងបង្កើត ឱកាសថ្មីៗ សម្រាប់ការផ្លាស់ប្តូរបទពិសោធន៍ និងការពង្រឹងទំនាក់ទំនងរវាងកងទ័ពជើងទឹកនៃប្រទេសទាំងពីរ៕
