រាជធានីភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា នៅថ្ងៃទី១៧ ខែសីហា ឆ្នាំ២០២៦នេះ សម្តេច អមដំណេីរដោយអ្នកតំណាងរាស្ត្រខេត្តតាកែវជាច្រេីនរូបរួមមាន៖ លោកជំទាវ និន សាផុន, ឯកឧត្តម ម៉ុក ម៉ារ៉េត, ឯកឧត្តម ស៊ូ ភិរិន្ទ, លោកជំទាវ នូ សុវណ្ណនី និងឯកឧត្តម អ៊ិត សុខ បានអញ្ជើញចុះសួរសុខទុក្ខដោយផ្ទាល់ដល់ ឯកឧត្តម ច័ន្ទ សារុន តំណាងរាស្ត្រមណ្ឌលខេត្តតាកែវ ដែលកំពុងសម្រាកព្យាបាលជំងឺនៅមន្ទីរពេទ្យកាល់ម៉ែត។
ក្នុងឱកាសនៃការអញ្ជើញសួរសុខទុក្ខនេះ សម្តេចរដ្ឋសភាធិបតី បាននាំនូវការផ្តាំផ្ញើសាកសួរសុខទុក្ខ ក្តីកង្វល់ និងការយកចិត្តទុកដាក់ដ៏ជ្រាលជ្រៅបំផុតពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនចំពោះ ឯកឧត្តម ច័ន្ទ សារុន ព្រមទាំងក្រុមគ្រួសារ។
ទន្ទឹមនឹងនេះ សម្តេចប្រធានរដ្ឋសភា ក៏បានថ្លែងនូវការកោតសរសើរ និងអំណរគុណយ៉ាងជ្រាលជ្រៅចំពោះថ្នាក់ដឹកនាំ ព្រមទាំងក្រុមគ្រូពេទ្យ និងបុគ្គលិកសុខាភិបាលទាំងអស់នៃមន្ទីរពេទ្យកាល់ម៉ែត ដែលបានយកចិត្តទុកដាក់ និងលះបង់កម្លាំងកាយចិត្តក្នុងការពិនិត្យ ថែទាំ និងព្យាបាលជំងឺជូន ឯកឧត្តម ច័ន្ទ សារុន ក៏ដូចជាប្រជាពលរដ្ឋទូទៅ ប្រកបដោយក្រមសីលធម៌វិជ្ជាជីវៈខ្ពស់ និងទឹកចិត្តមេត្តាករុណាចេញពីបេះដូង។
សម្ដេចបានជូនពរឱ្យ ឯកឧត្តម ច័ន្ទ សារុន តំណាងរាស្ត្រមណ្ឌលខេត្តតាកែវ ឆាប់បានជាសះស្បើយពីជំងឺផងដែរ៕
