ខេត្តរតនគិរី៖ ឯកឧត្តម គិត ទ្រី សមាជិកគណៈកម្មការទី១ នៃរដ្ឋសភា និងជាតំណាងរាស្ត្រមណ្ឌលខេត្តរតនគិរី នាព្រឹកថ្ងៃទី១៩ ខែកក្កដា ឆ្នាំ២០២៦ បានអញ្ជើញចុះសំណេះសំណាលសួរសុខទុក្ខ ក្រុមគ្រួសារវីរកងទ័ពជួរមុខ (ដែលកំពុងឈរជើងប្រចាំការ នៅតំបន់អានសេះ និងតំបន់ មុំបី) ចំនួន ០៨គ្រួសារ ដែលរស់នៅក្នុងឃុំហាត់ប៉ក់ ស្រុកវើនសៃ ខេត្តរតនគិរី។
ពិធីនេះមានការអញ្ជើញចូលរួមពី ឯកឧត្តម សូវ៉ាន់ ខាំវណ្ណ ទីប្រឹក្សាក្រសួងមហាផ្ទៃ ឯកឧត្តម មូល សំវាំង សមាជិកក្រុមប្រឹក្សាខេត្ត ឯកឧត្តម វ៉ាន់ សោភា អភិបាលរងខេត្ត រួមជាមួយលោកស្នងការរងនគរបាលខេត្ត លោកមេបញ្ជាការតំបន់ប្រតិបត្តិការសឹករងខេត្ត លោកអភិបាលស្រុកវើនសៃ លោកមេឃុំហាត់ប៉ក់ មន្ត្រីទីស្នាក់ការរដ្ឋសភាមណ្ឌលខេត្តរតនគិរី ព្រមទាំងក្រុមការងារពាក់ព័ន្ធជាច្រើនរូបទៀត។
ក្នុងឱកាសជួបសំណេះសំណាលនោះ ឯកឧត្តម គិត ទ្រី បាននាំនូវប្រសាសន៍ផ្ដាំផ្ញើសួរសុខទុក្ខ និងក្តីនឹករលឹកបំផុតពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តម បានគូសបញ្ជាក់ថា ជានិច្ចកាល សម្តេចទាំងបី លោកតែងតែយកចិត្តទុកដាក់ និងគិតគូរខ្ពស់ពីសុខទុក្ខ ក៏ដូចជាជីវភាព រស់នៅរបស់បងប្អូនកងទ័ព និងក្រុមគ្រួសារវីរកងទ័ពជួរមុខ ដែលកំពុងឈរជើងប្រចាំការបំពេញភារកិច្ចការពារជាតិ នៅតំបន់អានសេះ និងតំបន់ មុំបី ដោយក្តីលះបង់ខ្ពស់។
ជាមួយគ្នានោះ ឯកឧត្តម គិត ទ្រី និងក្រុមការងារ បានប្រគល់ជូននូវគ្រឿងឧបភោគបរិភោគ និងថវិកាមួយចំនួន ជូនដល់គ្រួសារវីរកងទ័ពទាំង ០៨គ្រួសារ ដើម្បីឆ្លុះបញ្ចាំងពីស្មារតីសាមគ្គីភាព និងការរួមចំណែកសម្រាលបន្ទុកជីវភាពប្រចាំថ្ងៃនៅក្នុងគ្រាលំបាក៕