(កំពង់ឆ្នាំង)៖ ឯកឧត្តមបណ្ឌិត ហ៊ឺ វីរៈ អ្នកតំណាងរាស្ត្រមណ្ឌលខេត្តកំពង់ឆ្នាំង រួមជាមួយក្រុមការងារ បានចុះបំពេញបេសកកម្មការងារនៅក្នុងស្រុកកំពង់ត្រឡាច កាលពីថ្ងៃទី១១ ខែកក្កដា ឆ្នាំ២០២៦ម្សិលមិញនេះ ដើម្បីពិភាក្សាការងារពុទ្ធសាសនា ជួបសំណេះសំណាលជាមួយគ្រិស្តសាសនិក និងសួរសុខទុក្ខប្រជាកសិករផ្ទាល់ដល់មូលដ្ឋាន។
ឯកឧត្តមបណ្ឌិត បានអញ្ជើញជួបពិភាក្សាជាមួយ ព្រះគ្រូ ផន សុជាតិ ព្រះសមុហ៍ អនុគណស្រុកកំពង់ត្រឡាច ព្រះចៅអធិការវត្តសំរិទ្ធជ័យ និងវត្តសុវណ្ណគង្គា (ហៅវត្តក្បាលកោះ) ព្រមទាំងអាចារ្យគណៈកម្មការ និងអាជ្ញាធរភូមិ-ឃុំ ដើម្បីត្រៀមរៀបចំពិធីបុណ្យសម្ពោធឆ្លងសមិទ្ធផលនានានៅវត្តសុវណ្ណគង្គា នាពេលខាងមុខ។ កិច្ចពិភាក្សានេះបានសម្រេចលើការរៀបចំបរិស្ថាន ទីធ្លាពិធី និងរបាយការណ៍ហិរញ្ញវត្ថុសម្រាប់ការ សាងសង់ រួមជាមួយការប្រគេនបច្ច័យដល់ព្រះសង្ឃ និងជូនថវិកាលើកទឹកចិត្តដល់គណៈកម្មការអាចារ្យវត្តផងដែរ។
បន្ទាប់មក ឯកឧត្តមបណ្ឌិត បានបន្តដំណើរទៅជួបសំណេះសំណាលជាមួយគ្រូគង្វាល និងគ្រិស្តសាសនិក នៅវិហារទទួលព្រះពរ ស្ថិតក្នុងភូមិខ្លាគ្រហឹម ឃុំអំពិលទឹក។ ក្នុងជំនួបនោះ ឯកឧត្តមបានគូសបញ្ជាក់ថា ក្រោមការដឹកនាំរបស់ សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្ត្រី កម្ពុជាសម្រេចបាននូវសុខសន្តិភាពពេញលេញ និងសុខដុមរមនាសាសនាយ៉ាងពិតប្រាកដ ដោយគ្មានការរើសអើងសាសនាឡើយ ពោលគឺគ្រប់សាសនាទាំងអស់រស់នៅជុំគ្នាយ៉ាងសុខសាន្តក្រោមដំបូលសន្តិភាពតែមួយ និងបានរួមចំណែកយ៉ាងសំខាន់ក្នុងការអភិវឌ្ឍសង្គមជាតិ។
នៅថ្ងៃដដែលនោះដែរ ឯកឧត្តមបណ្ឌិត ក៏បានចុះសួរសុខទុក្ខគ្រួសារកសិករដាំដំណាំពោតចំនួន ២គ្រួសារ នៅភូមិព្រែកគន្លង ឃុំកំពង់ត្រឡាច ដើម្បីស្វែងយល់ពីការបង្កបង្កើនផល និងជីវភាពរស់នៅផ្ទាល់។ ជាមួយគ្នានោះ ឯកឧត្តមបាននាំយកវត្ថុកំដរដៃ រួមមាន សារុង ក្រមា ភេសជ្ជៈ និងថវិកាមួយចំនួន ជូនដល់កសិករទាំងពីររូប ដើម្បីជួយសម្រាលជីវភាពគ្រួសារផងដែរ។