ឯកឧត្តម ទី សុគន្ធ លេខាធិការគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា និងជាប្រធានដឹកនាំកិច្ចប្រជុំក្រុមប្រឹក្សាពិគ្រោះយោបល់អាយប៉ាស្ដីពីគ្រឿងញៀនលើកទី៥ AIPACODD-5 បានអញ្ជើញដឹកនាំកិច្ចប្រជុំ ក្រុមការងារ  ដើម្បីពិនិត្យមើលវឌ្ឍនភាពការងារ សម្រាប់ការត្រៀមលក្ខណៈ ក្នុងការចូលរួមកិច្ចប្រជុំក្រុមប្រឹក្សាពិគ្រោះយោបល់អាយប៉ា ស្ដីពីគ្រឿងញៀនលើកទី៥ AIPACODD-5 ដែលសភាកម្ពុជាធ្វើជាម្ចាស់ផ្ទះតាមប្រព័ន្ធនិម្មិត នៅថ្ងៃទី២៤ ខែមិថុនា ឆ្នាំ២០២២ខាងមុខ នេះ។

កិច្ចប្រជុំនេះ រៀបចំឡើងនៅវិមានរដ្ឋសភា នាព្រឹកថ្ងៃទី២១ ខែមិថុនា ឆ្នាំ២០២២ ដោយមានការចូលរួមពី ឯកឧត្ដម លោកជំទាវ ជា សមាជិក សមាជិការដ្ឋសភា ព្រឹទ្ធសភា តំណាងអាជ្ញាធរជាតិប្រយុទ្ធប្រឆាំងគ្រឿងញៀន ទីប្រឹក្សាសភា ថ្នាក់ដឹកនាំ និងមន្ត្រីពាក់ព័ន្ធ នៃអគ្គលេខាធិការដ្ឋានសភាទាំងពីរ។

នៅក្នុងឱកាសនោះ ឯកឧត្ដម ឡេង ប៉េងឡុង អគ្គលេខាធិការរដ្ឋសភា បានរាយការណ៍ជូនអង្គប្រជុំអំពីវឌ្ឍនភាពការងារ ដែលក្រុម ការងារនៃអគ្គលេខាធិការដ្ឋានរដ្ឋសភា បានបំពេញនាពេលកន្លងមក សម្រាប់ត្រៀមលក្ខណៈបម្រើឲ្យដំណើរការកិច្ចប្រជុំ AIPACODD-5 នាពេលខាងមុខ រួចមក ឯកឧត្តម ទី សុគន្ធ ជាប្រធានអង្គប្រជុំក៏បានផ្ដល់តួនាទីជូន នាយឧត្ដមសេនីយ៍ មាស វីរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន និង ឯកឧត្ដម ឆាយ វណ្ណា សមាជិកព្រឹទ្ធសភា និងជាប្រធានប្រតិភូសភាកម្ពុជា សម្រាប់ កិច្ចប្រជុំក្រុមប្រឹក្សាពិគ្រោះយោបល់អាយប៉ា ស្ដីពីគ្រឿងញៀនលើកទី៥ ឡើងធ្វើបទបង្ហាញពីខ្លឹមសារស្លាយ ដែលត្រូវថ្លែងទៅកាន់កិច្ច- ប្រជុំ AIPACODD-5។

បន្ទាប់ពីស្ដាប់បទបង្ហាញចប់ ឯកឧត្តម ទី សុគន្ធ បានស្នើឲ្យ នាយឧត្ដមសេនីយ៍ មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធ- ប្រឆាំងគ្រឿងញៀន ធ្វើការសង្ខេបខ្លឹមសារស្លាយបន្ថែមទៀត ប្ដូរពីរយៈពេលជាង២០នាទី មកត្រឹមរយៈពេលតែ១០នាទីវិញ។ ឯកឧត្តម ក៏បានស្នើសមាជិកអង្គប្រជុំចូលរួមផ្ដល់មតិយោបល់ ដើម្បីធ្វើយ៉ាងណាឲ្យខ្លឹមសារនៃបទបង្ហាញអាជ្ញាធរជាតិប្រយុទ្ធប្រឆាំងគ្រឿងញៀន និងប្រតិភូសភាកម្ពុជាកុំឲ្យមានស្ទួនខ្លឹមសារគ្នា និងត្រូវច្បាស់ថា មួយជាស្ថាប័នសាធារណៈ ជាអ្នកអនុវត្តការងារ និងជាមួយស្ថាប័នអ្នក- ធ្វើគោលនយោបាយ ហើយស្លាយគឺត្រូវឲ្យខ្លីតែខ្លឹម។

ក្រោយពីបានទទួលមតិយោបល់ពីអង្គប្រជុំរួចមក ឯកឧត្តម ទី សុគន្ធ បានថ្លែងអំណរគុណចំពោះក្រុមការងារទាំងអស់ ដែលបានខិតខំ បំពេញការងារនាពេលកន្លងមក និងបានអញ្ជើញមកចូលរួមក្នុងកិច្ចប្រជុំ ដោយបានផ្ដល់នូវមតិយោបល់ល្អៗបន្ថែមទៀតនាពេលនេះ។

ឯកឧត្តមសង្ឃឹមថា ក្រុមការងារទាំងអស់នឹងបន្តធ្វើកិច្ចសហការគ្នាបន្ថែមទៀត ក្នុងការបំពេញការងារដែលនៅសេសសល់ ឲ្យបានចប់ សព្វគ្រប់ សម្រាប់ត្រៀមលក្ខណៈឲ្យបានគ្រប់ជ្រុងជ្រោយ ដើម្បីឲ្យដំណើរការកិច្ចប្រជុំក្រុមប្រឹក្សាពិគ្រោះយោបល់អាយប៉ា ស្ដីពីគ្រឿង- ញៀន លើកទី៥ AIPACODD-5 ដែលសភាកម្ពុជាធ្វើជាម្ចាស់ផ្ទះទទួលបានជោគជ័យជូនជាតិមាតុភូមិ៕

អត្ថបទ និងរូបភាព ដោយនាយកដ្ឋានព័ត៌មាន