ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា លោកជំទាវ ឡោក ខេង បានជំរុញអាជ្ញាធរខេត្តព្រៃវែង ជួយផ្សព្វផ្សាយ លើកទឹកចិត្តដល់ប្រជាពលរដ្ឋ និងកម្មករ កម្មការិនី រោងចក្រ កាត់ដេរទំាងអស់ ពីការប្រើប្រាស់ប័ណ្ណ (ប.ស.ស) និងប័ណ្ណសមធម៌ ក្នុងការព្យាបាលជំងឺដោយមិនគិតថ្លៃ នៅតាមមន្ទីរពេទ្យរដ្ឋ និង ឯកជនមួយចំនួន។
លោកជំទាវ ប្រធានគណៈកម្មការរដ្ឋសភា បានលើកឡើងថា រាជរដ្ឋាភិបាលបានកំពុងខិតខំ និងយកចិត្តទុកដាក់ ក្នុងការផ្តល់សេវា ព្យាបាលដល់ពលរដ្ឋ ពិសេសពលរដ្ឋក្រីក្រ និងកម្មករ កម្មការិនី តាមរោងចក្រ ដើម្បីលើកកម្ពស់ជីវភាព និងការរស់នៅរបស់ពួកគាត់ ឲ្យកាន់តែប្រសើរឡើង។
ការលើកឡើងរបស់ លោកជំទាវ ឡោក ខេង បែបនេះ នៅក្នុងឱកាសដែលលោកជំទាវ បានដឹកនាំប្រតិភូគណៈកម្មការចុះសិក្សា ស្វែងយល់ពីវិស័យការងារ ដែលគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា ទទួលបន្ទុក នាព្រឹកថ្ងៃចន្ទ ទី២ ខែកញ្ញា ឆ្នាំ២០១៩។
នៅក្នុងបេសកកម្មនៅខេត្តព្រៃវែងនេះ លោកជំទាវ ឡោក ខេង និងសមាជិកគណៈកម្មការ បានជួបពិភាក្សាការងារជាមួយ ឯកឧត្តម ជា សុមេធី អភិបាលនៃគណៈអភិបាលខេត្តព្រៃវែង ហើយបានលើកឡើងនូវសំណើខាងលើនោះ។
ឯកឧត្តម ជា សុមេធី បានស្វាគមន៍ចំពោះវត្តមានគណៈកម្មការជំនាញរដ្ឋសភានៅលើទឹកដីខេត្តព្រៃវែង និងបានរាយការណ៍ជូនប្រតិភូ គណៈកម្មការរដ្ឋសភាពីវឌ្ឍនភាពរបស់ខេត្ត។ ឯកឧត្តមអភិបាលខេត្ត បានគូសបញ្ជាក់ថា មន្រ្តី និងអាជ្ញាធរខេត្តគ្រប់ជាន់ថ្នាក់ បាន យកចិត្តទុកដាក់ពីបញ្ហាសុខទុក្ខរបស់ពលរដ្ឋជាប្រចំា។ មិនថាសេវាសុខាភិបាលនោះទេ សេវាសង្គមជាច្រើនទៀត មានទំាងការអប់រំ បរិស្ថាន កំពុងត្រូវបានពង្រឹងពង្រីកដោយមានការគំាទ្រពីស្ថាប័នជំនាញ។
បន្ទាប់ពីបានជួបពិភាក្សាការងារជាមួយជាអាជ្ញាធរខេត្តរួចហើយ លោកជំទាវ ឡោក ខេង បានដឹកនាំប្រតិភូគណៈកម្មការចុះពិនិត្យមើល មន្ទីរពេទ្យបង្អែកស្រុកស្វាយអន្ទរ មន្ទីរពេទ្យបង្អែកខេត្ត រោងចក្រTop Silver Limited ដោយបានជម្រាបដល់ពលរដ្ឋ និងកម្មករដោយផ្ទាល់ ពីការយកចិត្តទុកដាក់របស់រាជរដ្ឋាភិបាលចំពោះសុខភាពពលរដ្ឋ។
លោកជំទាវបានជំរុញឲ្យពលរដ្ឋទៅទទួលសេវាព្យាបាលដោយឥតគិតថ្លៃ ដោយភ្ជាប់ទៅជាមួយប័ណ្ណសមធម៌ និងប័ណ្ណ(ប.ស.ស)ឲ្យបាន គ្រប់ៗគ្នា៕
អត្ថបទ និងរូបភាព ដោយនាយកដ្ឋានព័ត៌មាន