ខេត្តរតនគិរី៖ ឯកឧត្តម គិត ទ្រី សមាជិកគណៈកម្មការសិទ្ធិមនុស្ស ទទួលពាក្យបណ្ដឹងនិងអង្កេត និងអធិការកិច្ច (គណៈកម្មការទី១) នៃរដ្ឋសភា និងជាតំណាងរាស្ត្រមណ្ឌលខេត្តរតនគិរី នាព្រឹកថ្ងៃទី២២ ខែសីហា ឆ្នាំ២០២៦ បានអញ្ជើញចុះសួរសុខទុក្ខ សំណេះសំណាល និងនាំយកគ្រឿងឧបភោគបរិភោគ រួមជាមួយថវិកាមួយចំនួន ជូនដល់ក្រុមគ្រួសារវីរកងទ័ពជួរមុខចំនួន ២០គ្រួសារ និងស្ត្រីមេម៉ាយ ចាស់ជរាចំនួន ៥គ្រួសារ ដែលកំពុងស្នាក់នៅភូមិប៉ាកាឡាន់ និងភូមិកំពង់ចាម ឃុំប៉ាកាឡាន់ ស្រុកវ៉ើនសៃ ខេត្តរតនគិរី។
ពិធីនេះមានការអញ្ជើញចូលរួមពីសំណាក់ ឯកឧត្តម មូល សំវាំង សមាជិកក្រុមប្រឹក្សាខេត្ត លោក សន ពល មេបញ្ជាការរងតំបន់ប្រតិបត្តិការសឹករងខេត្ត លោក មាស ពៅបូរ៉ា ស្នងការរងខេត្ត លោក ចាន់ សារិន មេបញ្ជាការរងកងរាជអាវុធហត្ថខេត្ត លោក គង់ ស៊ីម៉េង ព្រះរាជអាជ្ញារង លោក ម៉ៅ សារី មេធាវី លោក អៀម អឿន ប្រធានមន្ទីរអភិវឌ្ឍន៍ជនបទ លោក កោះ ប៉ូឡូ អនុប្រធានមន្ទីរសុខាភិបាល លោក សូ វណ្ណធិន អភិបាលស្រុកវ៉ើនសៃ និងមន្ត្រីទីស្នាក់ការរដ្ឋសភាមណ្ឌលខេត្តរតនគិរី។
ឯកឧត្តម បាននាំនូវប្រសាសន៍ផ្ដាំផ្ញើសួរសុខទុក្ខពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាល សម្តេច និងថ្នាក់ដឹកនាំ តែងតែយកចិត្តទុកដាក់ខ្ពស់ចំពោះសុខុមាលភាពរបស់ប្រជាពលរដ្ឋនៅគ្រប់មជ្ឈដ្ឋាន។
ឯកឧត្តម ក៏បានលើកឡើងអំពីសភាពការណ៍តាមបណ្តោយព្រំដែនកម្ពុជា-ថៃ និងថ្លែងអំណរគុណយ៉ាងជ្រាលជ្រៅចំពោះកងកម្លាំងគ្រប់ប្រភេទ ដែលបានឈរជើងការពារបូរណភាពទឹកដី និងអធិបតេយ្យជាតិដោយមិនរាថយ ព្រមទាំងបានអំពាវនាវឱ្យប្រជាពលរដ្ឋបន្តពង្រឹងសាមគ្គីភាព ឯកភាពជាធ្លុងមួយ និងជឿជាក់លើការដឹកនាំរបស់រាជរដ្ឋាភិបាលកម្ពុជា ដើម្បីរួមគ្នារក្សាសុខសន្តិភាព ស្ថិរភាព និងអធិបតេយ្យជាតិឱ្យបានគង់វង្ស៕
