លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា បានលើកឡើងថា វេទិកាដែលប្រមូលផ្តុំគ្រប់ភាគីពាក់ព័ន្ធទាំងអស់ មានសារៈសំខាន់ខ្លាំងណាស់ក្នុងការនាំយកសំឡេងរបស់អ្នករស់នៅជាមួយជំងឺទឹកនោមផ្អែម ទៅកាន់អ្នកទទួលខុសត្រូវផ្នែកនយោបាយ និងសាជីវកម្មក្នុងតំបន់ ដើម្បីជំរុញឱ្យការថែទាំ និងព្យាបាលជំងឺទឹកនោមផ្អែមមានការគ្របដណ្តប់យ៉ាងទូលំទូលាយ ព្រមទាំងធានាថាគ្រប់គ្នាសុទ្ធតែមានលទ្ធភាពទទួលបានការព្យាបាល ពោលគឺ«គ្មាននរណាម្នាក់ត្រូវបានទុកចោលឡើយ»។
លោកជំទាវបានថ្លែងបែបនេះ នៅក្នុងឱកាសអញ្ជើញជាវាគ្មិន ក្នុងកិច្ចពិភាក្សាវគ្គទី១ នៃវេទិកាសភាស្តីពីជំងឺទឹកនោមផ្អែម ក្រោមប្រធានបទ «ភាពជាអ្នកដឹកនាំនយោបាយ ដើម្បីអនាគតប្រកបដោយសុខុមាលភាពល្អ» ដែលរៀបចំឡើងដោយបណ្តាញសភាសកលសម្រាប់ជំងឺទឹកនោមផ្អែម នៅថ្ងៃទី២១ ខែសីហា ឆ្នាំ២០២៦ នាទីក្រុងមែលប៊ន ប្រទេសអូស្ត្រាលី។
ក្នុងកិច្ចពិភាក្សានេះ លោកជំទាវ ប្រធានគណៈកម្មការទី៨ នៃរដ្ឋសភា បានធ្វើបទបង្ហាញដោយលើកស្ទួយភាពជាអ្នកដឹកនាំ និងការអភិវឌ្ឍសុខុមាលភាពសង្គម។ តាមរយៈការចែករំលែកបទពិសោធន៍ និងការធ្វើបទបង្ហាញ ដោយផ្ដោតលើការកសាងអនាគតប្រកបដោយចីរភាព ការពង្រឹងសមត្ថភាពយុវជន និងការគាំទ្រគោលនយោបាយសុខាភិបាលសាធារណៈ។
ទន្ទឹមគ្នា ឯកឧត្តម លោកជំទាវ ជាសមាជិកសភាមកពីប្រទេសឥណ្ឌា ឧបនាយករដ្ឋមន្ត្រីរដ្ឋ Tasmania សមាជិកាសភារដ្ឋ New South Wales និងអ្នកជំនាញសុខភាពសាធារណៈជាច្រើនរូបទៀត បានចូលរួមជាវាគ្មិន ដោយពិភាក្សាលើប្រធានបទ «ការទទួលបានសេវា សមភាព និងការកាត់បន្ថយគម្លាតសម្រាប់ការព្យាបាលជំងឺទឹកនោមផ្អែម»។
គួររំលឹកផងដែរថា លោកជំទាវ ឡោក ខេង ប្រធានគណៈកម្មការទី៨ បានដឹកនាំគណៈប្រតិភូកម្ពុជាចូលរួម «វេទិកាសភាស្តីពីជំងឺទឹកនោមផ្អែម ឆ្នាំ២០២៦ សម្រាប់តំបន់ប៉ាស៊ីហ្វិកខាងលិច» ដែលបានប្រព្រឹត្តទៅចាប់ពីថ្ងៃទី១៨ ដល់ថ្ងៃទី២១ ខែសីហា ឆ្នាំ២០២៦ នាទីក្រុងមែលប៊ន ប្រទេសអូស្ត្រាលី។
