ខេត្តកំពង់ចាម៖ ឯកឧត្តម ញឿន រ៉ាដែន សមាជិកគណៈកម្មការសុខាភិបាល សង្គមកិច្ច អតីតយុទ្ធជន យុវនីតិ សម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា និងជាតំណាងរាស្ត្រមណ្ឌល ខេត្តកំពង់ចាម នៅថ្ងៃទី២១ ខែសីហា ឆ្នាំ២០២៦ បានដឹកនាំសហការី ចុះជួបសំណេះសំណាល សួរសុខទុក្ខ និងស្វែងយល់ ដោយផ្ទាល់ពីស្ថានភាពជីវភាពរស់នៅរបស់បងប្អូនប្រជាពលរដ្ឋតាមខ្នងផ្ទះ ក្នុងស្រុកជើងព្រៃ និងស្រុកបាធាយ ខេត្តកំពង់ចាម។
ការចុះជួបប្រជាពលរដ្ឋដោយផ្ទាល់នៅតាមមូលដ្ឋាននេះ គឺជាការបង្ហាញពីការយកចិត្តទុកដាក់ និងការទទួល ខុសត្រូវរបស់តំណាងរាស្ត្រ ក្នុងការស្តាប់ និងស្វែងយល់ពីស្ថានភាពជាក់ស្តែង ក៏ដូចជាក្តាប់ឱ្យបាននូវកង្វល់ និងសំណូមពររបស់ប្រជាពលរដ្ឋ ដើម្បីចូលរួមស្វែងរកដំណោះស្រាយសមស្រប និងបម្រើផលប្រយោជន៍ ប្រជាពលរដ្ឋឱ្យកាន់តែប្រសើរ។
សកម្មភាពនេះក៏បានរួមចំណែកពង្រឹងទំនាក់ទំនង និងភាពស្និទ្ធស្នាលរវាងតំណាងរាស្ត្រ និងប្រជាពលរដ្ឋ នៅមូលដ្ឋាន ព្រមទាំងជំរុញការចុះបំពេញភារកិច្ចរបស់តំណាងរាស្ត្រឱ្យកាន់តែជិតស្និទ្ធជាមួយប្រជាពលរដ្ឋ៕
