ទីក្រុងប៉េកាំង-ខេត្តហៃណាន ប្រទេសចិន៖ ឯកឧត្តម សន សារ៉ាណា សមាជិកគណៈកម្មការទី៥ នៃរដ្ឋសភា បានអញ្ជើញរួមដំណើរជាមួយគណៈប្រតិភូសភាកម្ពុជា ដឹកនាំដោយ ឯកឧត្តម យស ផានីត្តា ប្រធានគណៈកម្មការទី២ នៃព្រឹទ្ធសភា ដើម្បីចូលរួមសិក្ខាសាលាសម្រាប់សមាជិកសភាអាស៊ាន ដែលប្រព្រឹត្តទៅចាប់ពីថ្ងៃទី២០ ដល់ថ្ងៃទី២៦ ខែសីហា ឆ្នាំ២០២៦ នៅទីក្រុងប៉េកាំង និងខេត្តហៃណាន នៃសាធារណរដ្ឋប្រជាមានិតចិន។
ក្នុងពិធីបើកសិក្ខាសាលា ឯកឧត្តម He Wei អនុប្រធានសភាប្រជាជនចិន បានស្វាគមន៍គណៈប្រតិភូសភានៃបណ្តាប្រទេសសមាជិកអាស៊ាន ដែលបានអញ្ជើញចូលរួមក្នុងសិក្ខាសាលាដ៏មានសារៈសំខាន់នេះ។ ឯកឧត្តមបានលើកឡើងពីសារៈសំខាន់នៃការរក្សាបរិយាកាសសន្តិភាព និងការអភិវឌ្ឍក្នុងតំបន់ ការពង្រឹងភាពធន់នៃសេដ្ឋកិច្ច ព្រមទាំងការលើកកម្ពស់ការរៀនសូត្រ និងការផ្លាស់ប្តូរបទពិសោធន៍ពីគ្នាទៅវិញទៅមក ដើម្បីរួមចំណែកពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ អាស៊ាន-ចិន។
ជាមួយគ្នានេះ ឯកឧត្តម យស ផានីត្តា ប្រធានគណៈប្រតិភូសភាកម្ពុជា បានថ្លែងក្នុងពិធីបើកសិក្ខាសាលាថា ឆ្នាំ២០២៦ គឺជាខួប៥ឆ្នាំ នៃការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយ អាស៊ាន-ចិន។ ឯកឧត្តមបានបញ្ជាក់ថា ទំហំពាណិជ្ជកម្មរវាងអាស៊ាន និងចិន បានកើនឡើងដល់ជាង ១,០០០ ពាន់លានដុល្លារអាម៉េរិក នៅឆ្នាំ២០២៥ បន្ទាប់ពីអាស៊ានបានក្លាយជាដៃគូពាណិជ្ជកម្មធំបំផុតរបស់ចិន ចាប់តាំងពីឆ្នាំ២០២០។
ឯកឧត្តមបានបន្តថា ថ្មីៗនេះ អាស៊ានបានសម្រេចកិច្ចព្រមព្រៀងក្របខណ្ឌសេដ្ឋកិច្ចឌីជីថលតំបន់ ដែលនឹងបង្កើតកាលានុវត្តភាពជាយុទ្ធសាស្ត្រសម្រាប់ការពង្រឹងកិច្ចសហប្រតិបត្តិការសេដ្ឋកិច្ចឌីជីថលរវាងអាស៊ាន និងចិន។
សិក្ខាសាលាសម្រាប់សមាជិកសភានេះ ត្រូវបានសម្របសម្រួលដោយសាកលវិទ្យាល័យសេដ្ឋកិច្ច និងពាណិជ្ជកម្មអន្តរជាតិ ក្រោមប្រធានបទ «ការពង្រឹងការផ្លាស់ប្តូររវាងសមាជិកសភា ដើម្បីលើកកម្ពស់ភាពជាដៃគូយុទ្ធសាស្ត្រគ្រប់ជ្រុងជ្រោយ អាស៊ាន-ចិន»។
សិក្ខាសាលាផ្តោតលើការពិភាក្សា និងការផ្លាស់ប្តូរបទពិសោធន៍រវាងសមាជិកសភាអាស៊ាន និងចិន លើវិស័យសំខាន់ៗ រួមមាន នីតិរដ្ឋ និងអភិបាលកិច្ច ថាមពលស្អាត សេដ្ឋកិច្ចឌីជីថល សន្តិសុខស្បៀងអាហារ និងបញ្ញាសិប្បនិម្មិត ជាដើម។
ក្រៅពីការពិភាក្សា និងផ្លាស់ប្តូរបទពិសោធន៍ សមាជិកសភាចូលរួមក៏នឹងមានឱកាសធ្វើទស្សនកិច្ចសិក្សាទៅកាន់តំបន់ និងស្ថាប័នមួយចំនួន ដើម្បីស្វែងយល់បន្ថែមអំពីបទពិសោធន៍ និងសមិទ្ធផលនានារបស់ប្រទេសចិន ព្រមទាំងពង្រឹងការយល់ដឹង និងកិច្ចសហប្រតិបត្តិការរវាងស្ថាប័ននីតិប្បញ្ញត្តិនៃអាស៊ាន និងចិន៕
