រាជធានីភ្នំពេញ៖ គណៈប្រតិភូសភាទីម័រឡេស្តេ និងអន្តរសភាអាស៊ាន (AIPA) នាល្ងាចថ្ងៃទី២៣ ខែសីហា ឆ្នាំ២០២៦ បានអញ្ជើញមកដល់អាកាសយានដ្ឋានអន្តរជាតិតេជោ ដើម្បីចូលរួមកិច្ចប្រជុំកម្រិតតំបន់ស្ដីពី «ការវិនិយោគប្រកបដោយការទទួលខុសត្រូវសម្រាប់សន្តិសុខស្បៀង និងអាកាសធាតុ (ASEAN RAI)» ដែលរដ្ឋសភាកម្ពុជាទទួលធ្វើជាម្ចាស់ផ្ទះ។ ក្នុងឱកាសនោះ ឯកឧត្តម វ៉ាន់ ដារ៉ា សមាជិកគណៈកម្មការទី៣ នៃរដ្ឋសភា បានអញ្ជើញទទួលស្វាគមន៍គណៈប្រតិភូយ៉ាងកក់ក្តៅ។
កិច្ចប្រជុំដ៏មានសារៈសំខាន់នេះ នឹងប្រព្រឹត្តទៅចាប់ពីថ្ងៃទី២៥ ដល់ថ្ងៃទី២៦ ខែសីហា ឆ្នាំ២០២៦ នៅវិមានរដ្ឋសភា តាមទម្រង់ផ្ទាល់ និងប្រព័ន្ធនិម្មិត (Zoom) ដោយផ្តោតលើរបៀបវារៈសន្ទនាគោលនយោបាយសំខាន់ៗចំនួន ៤ រួមមាន៖
១.ប្រព័ន្ធស្បៀងអាហារដែលធន់នឹងអាកាសធាតុ និងការជំរុញរបៀបវារៈ ASEAN RAI
២.ការស្វែងយល់លើវិមាត្រសេដ្ឋកិច្ចនៃការវិនិយោគប្រកបដោយការទទួលខុសត្រូវ
៣.ការពង្រឹងសកម្មភាពសភា និងភាពជាដៃគូពហុភាគីដើម្បីសន្តិសុខស្បៀង និងអាកាសធាតុ
៤.ការប្រែក្លាយកិច្ចសន្ទនាទៅជាសកម្មភាពជាក់ស្ដែង តាមរយៈតួនាទីរបស់សមាជិកសភា
ព្រឹត្តិការណ៍នេះមានការចូលរួមពីប្រតិភូសមាជិក AIPA, សមាជិករដ្ឋសភាកម្ពុជា, តំណាងក្រសួងកសិកម្ម បរិស្ថាន និងធនធានទឹក ព្រមទាំងអង្គការ FAO និងដៃគូអភិវឌ្ឍន៍នានា ក្នុងគោលបំណងផ្លាស់ប្តូរបទពិសោធន៍ និងពង្រឹងកិច្ចសហប្រតិបត្តិការ ស្របតាមក្របខ័ណ្ឌអនុវត្តរបស់សភាអាស៊ានស្ដីពីការវិនិយោគក្នុងវិស័យស្បៀង កសិកម្ម និងព្រៃឈើឆ្នាំ២០២៤-២០៣០៕
