នារសៀលថ្ងៃទី២៤ ខែមេសា ឆ្នាំ២០២៤ លោកជំទាវ ឡោក ខេង បានអញ្ជើញទៅទស្សនកិច្ចនៅសាជីវកម្មអន្តរជាតិ Cyberdyne ដែលបានបង្កើតឡើងដោយប្រើប្រាស់បច្ចេកវិទ្យាថ្មី ដើម្បីគាំទ្រដល់ប្រជាជនវ័យចំណាស់នៅក្នុងសង្គមជប៉ុន និងប្រជាជននៅលើពិភពលោក។
លោកសាស្ត្រាចារ្យ យ៉ូស៊ីយុគិ សាន់កៃ Yoshiyuki Sankai ប្រធាន និងជានាយកប្រតិបត្តិនៃសាជីវកម្ម Cyberdyne បានជម្រាបជូនគណៈប្រតិភូអំពីប្រវត្តិនៃការកកើតបច្ចេកវិទ្យាថ្មីរបស់សាជីវកម្មនេះ ដែលបច្ចុប្បន្នគឺឈានដល់បច្ចេកវិទ្យា5.0 ដែលត្រូវការគិតគូរទៅលើក្រុមមនុស្សវ័យចំណាស់ដោយប្រើបច្ចេកវិទ្យា AI។ Cyberdyne កំពុងធ្វើការលើកកម្ពស់អាជីវកម្មរបស់ខ្លួនដើម្បីបង្កើតអនាគតដ៏ល្អមួយ តាមរយៈការស្រាវជ្រាវ ការអភិវឌ្ឍ ការផលិត និងការដឹកជញ្ជូនប្រព័ន្ធ Cybernics ប្រកបដោយភាពច្នៃប្រឌិត ដោយផ្តោតទៅលើឱសថ និងសុខុមាលភាព ជីវិត និងកន្លែងធ្វើការ ដោយប្រើប្រាស់បច្ចេកវិទ្យាថ្មីៗ "Cybernics" ដោយរួមបញ្ចូលគ្នារវាងមនុស្ស មនុស្សយន្ត AI និងប្រព័ន្ធព័ត៌មាន។
Cybernics ជាផលិតផល AI-Robot កម្រិតខ្ពស់សម្រាប់ការថែទាំសុខភាព ធ្វើឱ្យប្រសើរឡើងនូវកម្លាំងពលកម្មដែលមានវ័យចំណាស់របស់យើង និងឆ្លើយតបទៅនឹងកម្លាំងការងារដែលធ្លាក់ចុះ។ តាមរយៈបច្ចេកវិទ្យានេះ ប្រព័ន្ធសរសៃប្រសាទរបស់មនុស្ស ប្រព័ន្ធសរីរវិទ្យា និងប្រព័ន្ធបរិស្ថានត្រូវបានភ្ជាប់ជាមួយកុំព្យូទ័រទំនើប ហើយទិន្នន័យដ៏ធំរបស់មនុស្ស និងវត្ថុត្រូវបានប្រមូលផ្តុំ វិភាគ និងដំណើរការ AI ដូច្នេះពន្លឿនការបង្កើតឧស្សាហកម្ម Cybernics ថ្មីមួយដែលរួមផ្សំ "មនុស្ស" ជាមួយ "Cyberspace និង Physical Space"។
លោកជំទាវ ក៏បានសាកល្បងប្រើប្រាស់ប្រព័ន្ធ Cybernics នេះ ដោយការបញ្ជាពីខួរក្បាលទៅលើសរីរាង្គដែលមិនកម្រើក ឱ្យគ្រឿងយន្ត Cybernics ជាអ្នកធ្វើចលនា។ ឧបករណ៍នេះជួយសម្រួលដល់ការធ្វើចលនានៃសរីរាង្គរបស់មនុស្សចាស់ដែលពិបាកក្នុងការធ្វើបម្លាស់ទី ដេក ដើរ ឈរ អង្គុយ ដោយសារមានបញ្ហាចង្កេះ ស្វិតសាច់ដុំ ឬពិការភាពដោយសារជំងឺដាច់សរសៃឈាម និងជំងឺផ្សេងៗជាដើម។
អ្នកស្រាវជ្រាវនៃសាជីវកម្ម Cyberdyne បានបង្ហាញការចាប់អារម្មណ៍ក្នុងការនាំយកបច្ចេកវិទ្យានេះមកជូនប្រជាជនកម្ពុជា ដោយលោកសាស្ត្រាចារ្យក៏ធ្លាប់បានមកចូលរួមនៅក្នុងសិក្ខាសាលាផ្លាស់ប្តូរបទពិសោធន៍ជាមួយសកលវិទ្យាល័យភូមិន្ទភ្នំពេញផងដែរ។