ទីក្រុងផតវីឡា៖ លោកជំទាវ ឡោក ខេង ប្រធានគណៈកម្មការទី៨នៃរដ្ឋសភា បានលើកឡើងដូច្នេះ នៅក្នុងវេទិកាសមាជិកសភាអាស៊ីប៉ាស៊ីហ្វិក ស្តីពីសុខភាពសកល លើកទី៨។ លោកជំទាវបានបន្តថា ការរីកចម្រើនទាំងនេះគឺជាលទ្ធផលនៃ កិច្ចខិតខំប្រឹងប្រែងរបស់រាជរដ្ឋាភិបាលក្នុងនីតិកាលនៃរដ្ឋសភា កន្លងមកតាមរយៈការអនុវត្តយុទ្ធសាស្រ្ត និងផែនការអភិវឌ្ឍន៍ជាតិ ប្រកបដោយនិរន្តរភាព គោលដៅអភិវឌ្ឍន៍ (SDGs) ២០៣០ និងយុទ្ធសាស្រ្តសុខាភិបាល ក្នុងការលើកកម្ពស់សុខុមាលភាពរបស់ប្រជាជន ដោយផ្តោតលើការពង្រឹងការអភិវឌ្ឍវិស័យសុខាភិបាល និងប្រព័ន្ធគាំពារសង្គម។ ជាពិសេស រដ្ឋាភិបាលកម្ពុជា បានផ្តល់អាទិភាពដល់ការវិនិយោគលើសុខភាពមនុស្ស និងការអភិវឌ្ឍធនធាន ដោយបានពង្រីកសាលាពេទ្យ, មហាវិទ្យាល័យគិលានុបដ្ឋាយិកា និងកម្មវិធី សុខភាពសម្ព័ន្ធមិត្ត ព្រមទាំងបាននឹងកំពុងអនុវត្តកម្មវិធីអាហារូបករណ៍ដើម្បីគាំទ្រការអប់រំអ្នកជំនាញផ្នែកថែទាំសុខភាពផងដែរ។
នៅក្នុងនីតិកាលទី៧នៃរដ្ឋសភា រាជរដ្ឋាភិបាលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ប្តេជ្ញាចិត្តយ៉ាងខ្លាំង ក្នុងការបន្តបេសកកម្មនេះ ដោយជំរុញលើកកម្ពស់ពង្រឹងវិស័យសុខាភិបាល និងប្រព័ន្ធការពារសុខភាពសង្គម ដោយពង្រីកសេវាថែទាំសុខភាពឆ្ពោះទៅរក ការគ្របដណ្តប់ សុខភាពជាសកល ក្រោមពាក្យស្លោកថា "មិនទុកឱ្យពលរដ្ឋណាម្នាក់មិនទទួលបានសេវាថែទាំសុខភាពនោះទេ"។
គួរបញ្ជាក់ផងដែរថា នារសៀលថ្ងៃទី៤ ខែកញ្ញា ឆ្នាំ២០២៤នេះ លោកជំទាវ ឡោក ខេង បានចូលរួមនៅក្នុងកិច្ចពិភាក្សាស្តីពី “ការបង្កើតធនធានមនុស្ស សុខាភិបាលនាពេលអនាគតសម្រាប់តំបន់ប៉ាស៊ីហ្វិកខាងលិច” និងចូលរួមកិច្ចពិភាក្សាជាក្រុមជាមួយសមាជិក សមាជិកាសភា ប្រមាណ១៣ប្រទេស ក្នុងតំបន់អាស៊ីប៉ាស៊ីហ្វិក លើប្រធានបទទី១ “បទពិសោធសភាក្នុងការកំណែទម្រង់ប្រព័ន្ធសុខាភិបាល” និងប្រធានបទទី២ “ការចូលរួមរបស់សហគមន៍ និងធនធានមនុស្សសុខាភិបាល”។
ថ្លែងនៅក្នុងកិច្ចពិភាក្សា លោកជំទាវ ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី (គណៈកម្មការទី៨) នៃរដ្ឋសភា បានសង្កត់ធ្ងន់ផងដែរថា កម្ពុជាត្រូវការជំនួយហិរញ្ញវត្ថុដើម្បីពង្រីកការបណ្តុះបណ្តាលកម្មវិធី, កែលម្អហេដ្ឋារចនាសម្ព័ន្ធសុខភាព, ការគាំទ្រក្នុងការផ្តល់ឧបករណ៍សម្ភារៈវេជ្ជសាស្រ្ត។ ដូច្នេះ ការពង្រឹងភាពជាដៃគូក្នុងការផ្លាស់ប្តូរចំណេះដឹង បង្កើនសមត្ថភាព និងបង្កើនល្បឿនប្រព័ន្ធសុខភាព ឌីជីថល គឺជារឿងចាំបាច់។