ឯកឧត្ដម ទី សុគន្ធ ប្រធានប្រតិភូគណៈកម្មាធិការសេដ្ឋកិច្ចអាយប៉ា កម្ពុជា បានដឹកនាំសហការី អញ្ជើញចូលរួមកិច្ចប្រជុំគណៈកម្មាធិការ សេដ្ឋកិច្ចអន្តរសភាអាស៊ាន អាយប៉ា តាមរយៈប្រព័ន្ធវីដេអូ ដែលភ្ជាប់ពីវិមានរដ្ឋសភាទៅទីក្រុងបានដាស៊េរីបេហ្កាវ៉ាន់ ប្រទេសព្រុយណេ ដារូស្សាឡាម ក្នុងឱកាសនៃមហាសន្និបាតអន្តរសភាអាស៊ាន (អាយប៉ា) លើកទី៤២ ដែលសភាប្រទេសព្រុយណេដារូស្សាឡាម ធ្វើជា ម្ចាស់ផ្ទះ ដោយកិច្ចប្រជុំបានលើកយកសេចក្ដីព្រាងសេចក្ដីសម្រេចចំនួនពីរ មកធ្វើការពិភាក្សាគ្នា នៅរសៀលថ្ងៃអង្គារ ទី២៤ ខែសីហា ឆ្នាំ២០២១។

សមាសភាពសមាជិកប្រតិភូគណៈកម្មាធិការសេដ្ឋកិច្ចអាយប៉ា កម្ពុជា ដែលចូលរួមនាពេលនេះដែរ រួមមាន ឯកឧត្ដម អ៊ុក ដាមរី សមាជិក រដ្ឋសភា ឯកឧត្ដម ខៀវ ភារិទ្ធ សមាជិករដ្ឋសភា និង ឯកឧត្ដម ព្រហ្ម វិរៈ អគ្គនាយកទំនាក់ទំនងអន្តរជាតិ ពិធីការ និងព័ត៌មាន នៃអគ្គលេខាធិការដ្ឋានរដ្ឋសភា ព្រមទាំងមន្ត្រីពាក់ព័ន្ធមួយចំនួនទៀត។

កិច្ចប្រជុំគណៈកម្មាធិការសេដ្ឋកិច្ចអន្តរសភាអាស៊ាន អាយប៉ា ដឹកនាំដោយ លោកជំទាវ Honourable Ms Siti Rozaimeriyanty Dato Seri Laila Jasa Haji Abdul Rahman សមាជិកក្រុមប្រឹក្សានីតិប្បញ្ញត្តិ នៃព្រុយណេដារូស្សាឡាម និងជាប្រធានគណៈកម្មាធិការ​សេដ្ឋកិច្ចនៃអន្តរសភាអាស៊ាន (AIPA) ដោយបានលើកយកសេចក្ដីព្រាងសេចក្ដីសម្រេចចំនួនពីរ មកធ្វើការពិភាក្សាគ្នា គឺទី១ សេចក្ដី- ព្រាងសេចក្ដីសម្រេចស្ដីពី ការជំរុញអាស៊ានឌីជីថលដោយបរិយាប័ន្ន ដើម្បីផ្ដល់ថាមភាពដល់សហគ្រាសខ្នាតតូច និងមធ្យម និងពង្រឹង សមាហរណកម្មសេដ្ឋកិច្ចអាស៊ាន។ ទី២ សេចក្ដីព្រាងសេចក្ដីសម្រេចស្ដីពី ការស្ដារសេដ្ឋកិច្ចឡើងវិញក្រោយជំងឺកូវីដ១៩៖ កិច្ចសហប្រតិ- បត្តិការសេដ្ឋកិច្ចក្នុងតំបន់អាស៊ាន។

ក្នុងការថ្លែងទៅកាន់កិច្ចប្រជុំ ឯកឧត្ដម ទី សុគន្ធ បានមានប្រសាសន៍លើកឡើងថា សព្វថ្ងៃអាស៊ានបានបង្ហាញសក្ដានុពលដ៏អស្ចារ្យរបស់ ខ្លួនសម្រាប់កិច្ចសហប្រតិបត្តិការ ដែលជាគន្លឹះមួយ សម្រាប់ស្ដារសេដ្ឋកិច្ចឡើងវិញដោយជោគជ័យចំពោះមុខជំងឺកូវីដ១៩។ សំឡេងឯក- ភាពរបស់យើងក្នុងការជំរុញឌីជីថលូបនីយកម្ម និងការគាំទ្រសហគ្រាសខ្នាតមីក្រូ តូច និងមធ្យម តាមរយៈយន្តការគាំទ្រផ្សេងៗ ដូចជា ការលើកកម្ពស់ទេពកោសលជំនាញឌីជីថល និងការបង្កើនសហគ្រិនភាព។ ការជ្រើសរើសធ្វើអក្ខរកម្មឌីជីថល និងជំនាញដល់សហ- គ្រាសខ្នាត មីក្រូ តូច និងមធ្យម គឺមានភាពសំខាន់ជាអាយុជីវិត ដោយសារសហគ្រាសទាំងអស់នេះ គឺជាឆ្អឹងខ្នងនៃសេដ្ឋកិច្ចរបស់ អាស៊ាន ហើយនឹងបន្តដើរតួនាទីសំខាន់សម្រាប់កំណើនសេដ្ឋកិច្ចតំបន់ ក្នុងរយៈពេល១០ឆ្នាំខាងមុខ។

ឯកឧត្ដមប្រធានគណៈប្រតិភូ បានមានប្រសាសន៍ទៀតថា កម្ពុជាកំពុងដំណើរការក្របខណ្ឌ នៃគោលនយោបាយសេដ្ឋកិច្ច និងសង្គម ឌីជីថលកម្ពុជា២០២១-២០៣៥ ដែលមានគោលបំណងពង្រឹងវិស័យបច្ចេកវិទ្យាគមនាគមន៍ និងព័ត៌មាន និងហេដ្ឋារចនាសម័ន្ធ ដើម្បី ដឹកនាំកម្ពុជាចូលទៅក្នុងយុគសម័យឌីជីថល។ ជាងនេះទៅទៀត ជំងឺកូវីដ១៩បាននាំឲ្យមានការប្រើប្រាស់បច្ចេកវិទ្យាឌីជីថលកើនឡើង យ៉ាងខ្លាំង ដូចជាសេវាបញ្ជូន និងការអប់រំបណ្ដុះបណ្ដាល ក៏ដូចជាបណ្ដាញពាណិជ្ជកម្មអេឡិចត្រូនិកតាមបណ្ដាញសង្គម Facebook ដែលមាន ប្រជាជនកម្ពុជាប្រមាណ៧០%កំពុងប្រើប្រាស់។

ឯកឧត្ដម ទី សុគន្ធ បានមានប្រសាសន៍ទៀតថា សេដ្ឋកិច្ចឌីជីថលប្រកបដោយកំណើន ក៏ដូចជាការរីកលូតលាស់ឧស្សាហកម្មទេស- ចរណ៍ដោយចីរភាព និងមានសារៈសំខាន់ ជាគន្លឹះស្លាប់រស់សម្រាប់ការងើបឡើងវិញ និងកំណើនរបស់អាស៊ានបន្ទាប់ពីជំងឺរាតត្បាត។ ដូច្នេះហើយជាសារៈសំខាន់ក្រៃលែង ដែលយើងត្រូវរួបរួមសាមគ្គី និងធ្វើការជាមួយគ្នា ដើម្បីធានាថាគោលនយោបាយសេដ្ឋកិច្ចឌីជីថល ការអនុវត្ត និងហេដ្ឋារចនាសម្ព័ន្ធទាំងអស់ ទទួលបានជោគជ័យពេញលេញ។

បន្ទាប់ពីមានការពិភាក្សាគ្នា ដោយមានការកែសម្រួលនូវចំណុចមួយចំនួនរបស់គណៈប្រតិភូសភា នៃបណ្ដាប្រទេសអាស៊ាន រួចមក កិច្ច- ប្រជុំគណៈកម្មាធិការសេដ្ឋកិច្ចអន្តរសភាអាស៊ាន អាយប៉ា ក៏បានឯកភាពគ្នា លើសេចក្តីព្រាងសម្រេចទាំងពីរ សម្រាប់ដាក់ជូនមហា- សន្និបាត អន្តរសភាអាស៊ានលើកទី៤២ ធ្វើការអនុម័តនៅក្នុងសម័យប្រជុំពេញអង្គលើកទី២របស់ខ្លួន នៅថ្ងៃទី២៥ ខែសីហា ឆ្នាំ២០២១ ៕

អត្ថបទ និងរូបភាព ដោយនាយកដ្ឋានព័ត៌មាន