ដើម្បីអោយការត្រៀមរៀបចំកិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ (ASEP-11) ដែលសភាកម្ពុជា នឹងធ្វើជាម្ចាស់ផ្ទះ នៅចុងឆ្នាំ ២០២០ អោយទទួលបានជោគជ័យ ឯកឧត្តម ព្រហ្ម វិរៈ អគ្គនាយក នៃអគ្គនាយកដ្ឋានទំនាក់ទំនងអន្តរជាតិ ពិធីការ និងព័ត៌មាន នៃអគ្គលេខាធិការដ្ឋានរដ្ឋសភា បានដឹកនាំប្រជុំពង្រឹងការអនុវត្តការងារ និងធ្វើការផ្សព្វផ្សាយបន្ថែមពីប្រវត្តិ និងដំណើរការកិច្ចប្រជុំ កំពូល អាស៊ី-អឺរ៉ុប ដែលហៅកាត់ថា (ASEM) និងកិច្ចប្រជុំភាពជាដៃគូសភាអាស៊ី-អឺរ៉ុប ដែលហៅកាត់ថា (ASEP) ដល់ក្រុមការងារទទួល បន្ទុក ក្រុមការងារទី២ ក្រុមការងារឡូជីស្ទីក ពិធីការ និងបដិសណ្ឋារកិច្ច និងក្រុមការងារសារព័ត៌មាន ផ្សព្វផ្សាយ និងICT។ កិច្ចប្រជុំ ត្រៀមនេះ ធ្វើឡើងនៅព្រឹកថ្ងៃទី១៩ ខែវិច្ឆិកា ឆ្នាំ២០១៩ នៅវិមានរដ្ឋសភា។

សូមជម្រាបថា ការទទួលធ្វើជាម្ចាស់ផ្ទះ កិច្ចប្រជុំភាពជាដៃគូសភាអាស៊ី-អឺរ៉ុប(ASEP) មានឈ្មោះជាភាសាអង់គ្លេស “Asia-Europe Parliamentary Partnership Meeting” គឺជាផ្នែកមួយនៃកិច្ចប្រជុំកំពូលអាស៊ី-អឺរ៉ុប ហៅកាត់ថា ASEM ដែលរាជរដ្ឋាភិបាលកម្ពុជាទទួល ធ្វើជាម្ចាស់ផ្ទះនៅចុងឆ្នាំ២០២០នេះ ផងដែរ។

អគ្គនាយកទំនាក់ទំនងអន្តរជាតិ ពិធីការ និងព័ត៌មាន នៃអគ្គលេខាធិការដ្ឋានរដ្ឋសភា ជាផ្នែកសំខាន់មួយ នៅក្នុងការត្រៀមរៀបចំ កិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ ដោយនៅក្នុងនោះ មានដូចជា ផ្នែកទំនាក់ទំនងអន្តរជាតិ ពិធីការ ព័ត៌មាន និងការ ផ្សព្វផ្សាយ ជាដើម។

នៅក្នុងកិច្ចប្រជុំព្រឹកមិញនេះ ក្រៅពីបានផ្សព្វផ្សាយពីខ្លឹមសារASEP និងASEM ហើយនោះ ឯកឧត្តម ព្រហ្ម វិរៈ បានពិនិត្យមើល លទ្ធផលការងារ ដែលបានអនុវត្ត និងទិសដៅការងារបន្ត តាមប្រតិទិនការងារ ដែលបានដាក់ចេញរួមមកហើយនោះផងដែរ៕

អត្ថបទ និងរូបភាព ដោយនាយកដ្ឋានព័ត៌មាន