នារសៀល ថ្ងៃអង្គារ ៤រោច ខែកត្តិក ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៩ ខែវិច្ឆិកា ឆ្នាំ២០២៤ ឯកឧត្តម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា បានជួបពិភាក្សាការងារជាមួយ ឯកឧត្តម ស៊ី ហុងឆាយ ប្រធានគណៈកម្មាធិការថវិកា នៃគណៈកម្មាធិការអចិន្ត្រៃយ៍សភាតំណាងប្រជាជនចិនទូទាំងប្រទេស នៅវិមានរដ្ឋសភា។

ឯកឧត្តម ស៊ី ហុងឆាយ មានបំណងចង់ស្វែងយល់ពីការកសាងច្បាប់ថវិការបស់ប្រទេសកម្ពុជា។ ទន្ទឹមនិងនោះ ឯកឧត្តម ក៏បានថ្លែងអំណរគុណផងដែរ ដែលរដ្ឋសភា និងរាជរដ្ឋាភិបាលកម្ពុជាដែលបានបន្តពង្រឹង ពង្រីក នូវចំណងមិត្តភាព សាមគ្គីភាពក្នុងយុទ្ធសាស្ត្រដែកថែបនិងយូរអង្វែងដើម្បីជួយគ្នាទៅវិញទៅមកក្នុងក្របខ័ណ្ឌតំបន់ និងអន្តរជាតិ ។ ឯកឧត្តម ក៏បានជម្រាប ជូនផងដែរពីតួនាទីនិងភារកិច្ចរបស់គណៈកម្មាធិការថវិកា នៃគណៈកម្មាធិការអចិន្ត្រៃយ៍សភាតំណាងប្រជាជនចិនទូទាំងប្រទេសក្នុងការកសាងថវិកាជាតិ និងគ្រប់គ្រងបំណុលជាតិ។

ជាការឆ្លើយតប ឯកឧត្តម ឈាង វុន បានមានប្រសាសន៍ថាក្នុងនាម ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា នៃព្រះរាជាណាចក្រកម្ពុជា ឯកឧត្តមសូមស្វាគមន៍ ឯកឧត្តម ស៊ី ហុងឆាយ ប្រធានគណៈកម្មាធិការកិច្ចការថវិកានៃគណៈកម្មាធិការអចិន្រ្តៃយ៍សភាតំណាងប្រជាជនចិនទូទាំងប្រទេស និងសហការី ក្នុងដំណើរទស្សនកិច្ចមកកាន់ព្រះរាជាណាចក្រកម្ពុជា នាពេលនេះ។ ទន្ទឹមនឹងនោះឯកឧត្តម បានចែករំលែកផងដែរនូវបទពិសោធស្តីពីការពិភាក្សានិងអនុម័តថវិកាប្រចាំឆ្នាំរបស់រាជរដ្ឋាភិបាលកម្ពុជា។

ជាចុងបញ្ចប់ ឯកឧត្តម ឈាង វុន បានធ្វើការស្នើទៅកាន់ ឯកឧត្តម ស៊ី ហុងឆាយ លើជំនួយបច្ចេកទេស រួមមានវគ្គបណ្តុះបណ្តាលនានា និងការផ្លាស់ប្ដូរបទពិសោធគ្នាទៅវិញទៅមកលើការតាក់តែងច្បាប់ផ្សេងៗទាក់ទងនឹងការគ្រប់គ្រងថវិកាជាតិ គ្រប់គ្រងបំណុល និងទ្រព្យសម្បត្តិជាតិ ព្រមទាំងសម្ភារៈមកកាន់រដ្ឋសភាកម្ពុជា៕