ទំព័រមុខ » ព័ត៌មាន » ព័ត៌មានប្រចាំថ្ងៃ » គណៈកម្មការជំនាញនៃរដ្ឋសភា សម្រេចបញ្ជូនសេចក្តីព្រាងច្បាប់ទាក់ទងនឹងពាណិជ្ជកម្មសេរី អាស៊ាន-ហុងកុង ទៅគណៈកម្មាធិការអចិន្រ្តៃយ៍រដ្ឋសភាវិញ បន្ទាប់ពីពិនិត្យសិក្សារួច
គណៈកម្មការជំនាញនៃរដ្ឋសភា សម្រេចបញ្ជូនសេចក្តីព្រាងច្បាប់ទាក់ទងនឹងពាណិជ្ជកម្មសេរី អាស៊ាន-ហុងកុង ទៅគណៈកម្មាធិការអចិន្រ្តៃយ៍រដ្ឋសភាវិញ បន្ទាប់ពីពិនិត្យសិក្សារួច
រៀបរៀងដោយ ៖​ NA1472 ​ នៅថ្ងៃទី (9/21/2020 11:19:41 PM )

សេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីអាស៊ាន-ហុងកុង នៃសាធារណរដ្ឋប្រជាមានិតចិន ត្រូវ បានអន្តរគណៈកម្មការជំនាញនៃរដ្ឋសភា ដឹកនាំដោយ លោកជំទាវ និន សាផុន ប្រធានគណៈកម្មការ សាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់នៃរដ្ឋសភា សហការ ជាមួយគណៈកម្មការកិច្ចការបរទេស សហប្រតិបត្តិការ អន្តរជាតិ ឃោសនាការ និងព័ត៌មាននៃរដ្ឋសភា ដែលមាន ឯកឧត្តម ឈាង វុន ជាប្រធាន លើកយកមកពិនិត្យសិក្សាជាមួយតំណាងរាជរដ្ឋាភិបាលដឹកនាំដោយ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងសហការី នៅរសៀលថ្ងៃទី២១ ខែកញ្ញា ឆ្នាំ២០២០ នៅវិមានរដ្ឋសភា។

លោកជំទាវ និន សាផុន បានមានប្រសាសន៍ថា កន្លងមកគណៈកម្មការបានប្រជុំផ្ទៃក្នុងគណៈកម្មការ ដើម្បីពិនិត្យសិក្សា និងបានធ្វើការ កែសម្រួលលើខ្លឹមសារ ពាក្យពេចន៍អក្ខរាវិរុទ្ធ នៃសេចក្តីព្រាងច្បាប់នេះខ្លះៗរួចមកហើយ ដើម្បីឲ្យមានលក្ខណៈសមស្របទៅតាមទម្រង់ ច្បាប់។ ក្នុងជំនួបពិភាក្សាជាមួយតំណាងរាជរដ្ឋាភិបាលនាពេលនេះ គណៈកម្មការក៏បានស្ដាប់នូវការបកស្រាយរបស់តំណាងរាជរដ្ឋាភិ- បាលយ៉ាងក្បោះក្បាយ និងបានយល់ច្បាស់គ្រប់ជ្រុងជ្រោយ ដូចនេះគណៈកម្មការសម្រេចថា នឹងបញ្ជូនសេចក្តីព្រាងច្បាប់ ស្តីពី ពាណិជ្ជកម្មសេរី អាស៊ាន-ហុងកុង នៃសាធារណរដ្ឋប្រជាមានិតចិននេះ ទៅគណៈកម្មាធិការអចិន្រ្តៃយ៍រដ្ឋសភា ដើម្បីដាក់បញ្ចូលក្នុង របៀបវារៈសម័យប្រជុំរដ្ឋសភានាពេលខាងមុខ។

លោកជំទាវក៏បានមានប្រសាសន៍លើកឡើងពីសារៈសំខាន់នៃសេចក្តីព្រាងច្បាប់នេះ ក្នុងការជំរុញកំណើនសេដ្ឋកិច្ចកម្ពុជា ជាការឆ្លើយ តបទៅនឹងការអភិវឌ្ឍរីកចម្រើនរបស់សង្គមជាតិ និងសម្រួលដល់ការធ្វើសមាហរណកម្មសេដ្ឋកិច្ចប្រកបដោយប្រសិទ្ធិភាព។

ក្នុងឱកាសនោះ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានជម្រាបជូនកិច្ចប្រជុំថា សេចក្តីព្រាងច្បាប់ស្តីពីការអនុម័ត យល់ព្រមលើកិច្ចព្រមព្រៀងពាណិជ្ជកម្មសេរីអាស៊ាន-ហុងកុង នៃសាធារណរដ្ឋប្រជាមានិតចិន ត្រូវបានរាជរដ្ឋាភិបាលកម្ពុជាចុះហត្ថ- លេខានៅថ្ងៃទី១២ ខែវិច្ឆិកា ឆ្នាំ២០១៧ ក្នុងការធ្វើសមាហរណកម្មសេដ្ឋកិច្ចទៅក្នុងសេដ្ឋកិច្ចតំបន់ និងពិភពលោក។ ហើយកិច្ចព្រម- ព្រៀងពាណិជ្ជកម្មសេរីអាស៊ាន-ហុងកុងនេះ មានគោលបំណងដូចជា៖

ទី១-ធ្វើសេរីភាវូបនីយកម្មនិងសម្រួលពាណិជ្ជកម្មទំនិញរវាងភាគីនៃកិច្ចព្រមព្រាងតាមរយៈលុបបំបាត់ពន្ធគយនិងរបាំងមិនមែនពន្ធគយ

ទី២-ធ្វើសេរីភាវូបនីយកម្មនិងសម្រួលពាណិជ្ជកម្មសេវាកម្មឲ្យបានច្រើនវិស័យ ទី៣-ជំរុញនិងលើកកម្ពស់កាលានុវត្តភាពវិនិយោគ

ទី៤-ពង្រឹងការធ្វើពិពិធកម្មលើកកម្ពស់ការតភ្ជាប់ពាណិជ្ជកម្មវិនិយោគនិងសេដ្ឋកិច្ចរវាងភាគីទាំងអស់

ទី៥-ផ្តល់ប្រព្រឹត្តិបត្តិកម្មពិសេសដល់សមាជិកអាស៊ាន ជាពិសេសសមាជិកអាស៊ានចូលថ្មី ដើម្បីសម្រួលដល់ការធ្វើសមាហរណកម្ម សេដ្ឋកិច្ចប្រកបដោយប្រសិទ្ធភាព៕

អត្ថបទ និងរូបភាព ដោយនាយកដ្ឋានព័ត៌មាន