សេចក្តីប្រកាសព័ត៌មាន ស្តីពីលទ្ធផលនៃកិច្ចប្រជុំគណៈកម្មាធិការអចិន្រ្តៃយ៍នៃរដ្ឋសភា ថ្ងៃអង្គារ ទី២ ខែមិថុនា ឆ្នាំ២០២០__ គណៈកម្មាធិការអចិន្ត្រៃយ៍រដ្ឋសភាកំណត់យកថ្ងៃទី៤ ខែមិថុនា ឆ្នាំ២០២០ បន្តសម័យប្រជុំរដ្ឋសភាលើកទី៤ នីតិកាលទី៦__ សារលិខិតរំលែកទុក្ខរបស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា ជូន លោកជំទាវ ង្វៀនធី គីមងិន ប្រធានរដ្ឋសភា នៃសាធារណរដ្ឋសង្គមនិយមវៀតណាម ចំពោះមរណភាពរបស់ ឯកឧត្តម វ៉ូ ម៉ៅ__ សម្តេចអគ្គមហាពញាចក្រី ហេង សំរិន ជំរុញឯកអគ្គរាជទូតកម្ពុជា ប្រចំាប្រទេសនានា តម្កល់ផលប្រយោជន៍ជាតិជាធំ ពង្រីកកិច្ចសហប្រតិបត្តិការជាមួយប្រទេសជាមិត្ត__ សេចក្តីព្រាងច្បាប់ពីរ ទាក់ទងការប្រឆំាងការសម្អាតប្រាក់ត្រូវបានគណៈកម្មការជំនាញរដ្ឋសភា និងតំណាងរាជរដ្ឋាភិបាល បញ្ចប់ការពិនិត្យសិក្សា__ គណៈកម្មការទី៣នៃរដ្ឋសភា ប្រជុំពិនិត្យលើរបាយការណ៍បូកសរុបលទ្ធផលការងាររបស់ក្រសួងស្ថាប័ន ក្នុងសមត្ថកិច្ចរបស់ខ្លួន__ គណៈកម្មការជំនាញរដ្ឋសភា គំាទ្រសេចក្តីព្រាងច្បាប់ស្តីពីការអនុម័តយល់ព្រមឱ្យព្រះរាជាណាចក្រកម្ពុជា ចូលជាភាគីនៃអនុសញ្ញាទីក្រុងប៊ែន ស្តីពីកិច្ចការពារស្នាដៃអក្សរសាស្រ្ត និងសិល្បៈឆ្នាំ១៨៨៦ និង...__ គណៈកម្មការជំនាញរដ្ឋសភា ប្រជុំជាមួយតំណាងរាជរដ្ឋាភិបាលពិនិត្យសេចក្តីព្រាងច្បាប់ ស្តីពីការជួយគ្នាទៅវិញទៅមកផ្នែកច្បាប់ ក្នុងវិស័យព្រហ្មទណ្ឌ__ គណៈកម្មការរដ្ឋសភាពិនិត្យសេចក្តីព្រាងច្បាប់២ ទាក់ទងនឹងការប្រឆាំងហិរញ្ញប្បទាន ការរីកសាយភាយអាវុធមហាប្រល័យ និងការប្រឆាំងការសម្អាតប្រាក់ និងហិរញ្ញប្បទានភេរវកម្ម__ ឯកឧត្តម ឈាង វុន ចុះផ្សព្វផ្សាយ និងក្រើនរំលឹកប្រជាពលរដ្ឋ ឲ្យបន្តប្រុងប្រយ័ត្ន និងការពារខ្លួនពីវីរុសកូវីដ COVID-19__ អគ្គលេខាធិការដ្ឋានរដ្ឋសភា គោរពជូនពរ សម្ដេចចក្រី ហេង សំរិន ក្នុងឱកាសចម្រើនជន្មាយុ គម្រប់៨៦ ឈានចូល៨៧ឆ្នាំ ៕


ទំព័រមុខ » ព័ត៌មាន » ព័ត៌មានប្រចាំថ្ងៃ » លោកជំទាវ កិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភា ជួបសម្តែងការគួរសមជាមួយអនុប្រធានគណៈកម្មការកិច្ចការបរទេស នៃក្រុមប្រឹក្សាសហព័ន្ធរុស្ស៊ី
លោកជំទាវ កិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភា ជួបសម្តែងការគួរសមជាមួយអនុប្រធានគណៈកម្មការកិច្ចការបរទេស នៃក្រុមប្រឹក្សាសហព័ន្ធរុស្ស៊ី
រៀបរៀងដោយ ៖​ NA1472 ​ នៅថ្ងៃទី (10/15/2019 6:37:41 AM )

កំឡុងពេលនៃមហាសន្និបាតលើកទី១៤១ របស់សហភាពអន្តរសភា IPU លោកជំទាវ កិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភា បានជួបសម្តែងការគួរសម និងពិភាក្សាការងារជាមួយ ឯកឧត្តម អង់ដ្រេ ឃ្លីម៉ូវ (Andrei Klimov) អនុប្រធានគណៈកម្មការ កិច្ចការបរទេស នៃក្រុមប្រឹក្សាសហព័ន្ធរុស្ស៊ី និងជាសមាជិកគណៈកម្មាធិការអចិន្រ្តៃយ៍ ICAPP នៅរសៀលថ្ងៃចន្ទ ទី១៤ ខែតុលា ឆ្នាំ២០១៩ នៅមជ្ឈមណ្ឌលសន្និបាត Sava Centre នាទីក្រុងប៊ែលក្រាត សាធារណរដ្ឋស៊ែប៊ី។

ជាបឋម ឯកឧត្តម អង់ដ្រេ ឃ្លីម៉ូវ បានផ្ញើការសាកសួរសុខទុក្ខជូន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និង សម្តេចអគ្គមហាពញាចក្រី ហេង សំរិន ប្រធាន រដ្ឋសភា និងសូមអរគុណយ៉ាងជ្រាលជ្រៅជូនចំពោះ លោកជំទាវ កិត្តិសង្គហបណ្ឌិត  ឃួន សុដារី ដែលបានចូលរួមធ្វើសេចក្តី ថ្លែងការណ៍ ក្នុងសន្និសីទតាមប្រព័ន្ធអុីនធើណិត នាឱកាសនៃពិធីបុណ្យម៉ារ៉ាតុង លើកទី៤ ដែលធ្វើឡើងនាទីក្រុង Vladivostock នៃសហព័ន្ធរុស្ស៊ី កាលពីថ្ងៃទី២០ ខែឧសភា ឆ្នាំ២០១៩ កន្លងទៅ។

ក្នុងជំនួបនេះ ឯកឧត្តម អង់ដ្រេ ឃ្លីម៉ូវ បានស្នើដល់ លោកជំទាវ ឃួន សុដារី ក្នុងនាមជាប្រធានក្រុមប្រឹក្សាវប្បធម៌អាស៊ី ចូលរួមសហការ និងគាំទ្រ ដល់គំនិតផ្តួចផ្តើមក្នុងការរៀបចំជម្រុញឱ្យមាននូវវេទិកាឌីជីថលជាផ្លូវការមួយ (Digital Platform) សម្រាប់ជាមធ្យោបាយក្នុងការ ជួបប្រាស្រ័យទាក់ទងគ្នារវាងបណ្តាប្រទេសមកពីគ្រប់ទិសទីក្នុងពិភពលោក ក្នុងគោលបំណងចែករំលែកនូវទស្សនៈ បទពិសោធន៍ ក៏ដូច ជាដំណោះស្រាយនូវរាល់បញ្ហានានាទាក់ទងនឹងវប្បធម៌។

ឯកឧត្តមបានលើកឡើងថា នៅពេលដែលបច្ចេកវិទ្យាឌីជីថលកាន់តែវិវត្តទៅមុខយ៉ាងទំនើប និងត្រូវបានអនុវត្តនៅគ្រប់ទីកន្លែង គឺវាបាន បង្ហាញពីឱកាសយ៉ាងច្រើនសម្រាប់អង្គការនានាក្នុងនោះមាន ICAPP ក៏ដូចជាក្រុមប្រឹក្សាវប្បធម៌អាស៊ី (ACC) ក្នុងការសម្រួលដល់ ការប្រាស្រ័យទាក់ទងគ្នា ដើម្បីធ្វើការផ្សព្វផ្សាយឱ្យកាន់តែទូលំទូលាយអំពីវប្បធម៌ អរិយធម៌ ក៏ដូចជាប្រជាធិបតេយ្យ និងតថភាព ជាក់ស្តែង ដែលកំពុងកើតមានឡើងក្នុងប្រទេសនីមួយ។

ឯកឧត្តមបានបន្ថែមទៀតថា ភាគីរុស្ស៊ីមានបច្ចេកទេសគ្រប់គ្រាន់ និងតម្រូវការចំណាយថវិកាមានកម្រិតទាបប៉ុណ្ណោះ ក្នុងការបង្កើតឱ្យ មាននូវប្រព័ន្ធឌីជីថល និងប្រើប្រាស់ជាផ្លូវការ ដើម្បីជាមធ្យោបាយក្នុងការទំនាក់ទំនងគ្នា។

ឯកឧត្តមបានគូសបញ្ជាក់បន្ថែមថា ស្របពេលដែលពិភពលោកត្រូវការជាសំខាន់នូវសន្តិភាព ដែលជាបុរេលក្ខខណ្ឌ វប្បធម៌ក៏រិតតែមាន សារៈសំខាន់ផងដែរ។ ក្នុងន័យនេះ ឯកឧត្តម អង់ដ្រេ ឃ្លីម៉ូវ បានបញ្ជាក់បន្ថែមថា បើយើងគ្មានវប្បធម៌ទេនោះ យើងក៏មិនមានដែរនូវ អរិយធម៌ដ៏រុងរឿង។

ឯកឧត្តមបានសង្កត់ធ្ងន់ថា វប្បធម៌គឺគ្មានព្រំដែនកំណត់ឡើយ ហើយគណបក្សនយោបាយ ជាតួអង្គដ៏សំខាន់ក្នុងការពន្លឿននូវរាល់ ដំណើការនានា។

តាមគំនិតរបស់ ឯកឧត្តម អង់ដ្រេ ឃ្លីម៉ូវ ជាបឋមយើងត្រូវមានគេហទំព័រមួយដែលជាមូលដ្ឋានគ្រឹះ ក្នុងការឈានឆ្ពោះទៅធ្វើទំនើបកម្ម ការប្រាស្រ័យទាក់ទងគ្នាតាមប្រព័ន្ធឌីជីថល។ ការណ៍ដែលឯកឧត្តមបានស្នើឱ្យកម្ពុជាជួយគាំទ្រនូវគំនិតផ្តួចផ្តើមនេះ ដោយសារឯកឧត្តម បានជ្រាបច្បាស់ពីសសរស្តម្ភទាំងបួនរបស់ ACC ដែលក្នុងនោះមានការផ្សារភ្ជាប់វប្បធម៌ ទៅនឹងនវានុវត្ត។

ជាការឆ្លើយតបទៅនឹងសំណូមពររបស់ ឯកឧត្តម អង់ដ្រេ ឃ្លីម៉ូវ លោកជំទាវ ឃួន សុដារី បានឯកភាពតាមគំនិតផ្តួចផ្តើមនេះ ដោយនេះ ជាទស្សនៈវិស័យរបស់រាជរដ្ឋាភិបាលកម្ពុជា ក្នុងការគិតគូរពីការវិវត្តឥតឈប់ឈរ នៃបច្ចេកវិទ្យាពីមួយជំនាន់ទៅមួយជំនាន់។ លោកជំទាវ បានជម្រាបជូន ឯកឧត្តម អង់ដ្រេ ឃ្លីម៉ូវ ផងដែរថា រាជរដ្ឋាភិបាលកម្ពុជា តាមរយៈក្រសួងប្រៃសណីយ៍ និងទូរគមនាគមន៍ និងអង្គការ ដៃគូអភិវឌ្ឍន៍នានា បានចាប់ផ្ដើមពិភាក្សារួមគ្នា អំពីបដិវត្តន៍ឧស្សាហកម្ម ជំនាន់ទី៤ សំដៅលើការអភិវឌ្ឍបច្ចេកវិទ្យាជឿនលឿន ដូចជា ទំនើបកម្មលើបណ្ដាញទូរគមនាគមន៍ និងចំណេះធ្វើថ្មីៗ អំពីការគ្រប់គ្រងផលិតកម្មជាដើម ដើម្បីសម្រេចចក្ខុវិស័យឆ្នាំ២០៣០ និងឆ្នាំ ២០៥០ ស្របតាមយុទ្ធសាស្ត្រចតុកោណ និងផែនការយុទ្ធសាស្ត្រអភិវឌ្ឍន៍ជាតិ។

លោកជំទាវបានគូសបញ្ជាក់បន្ថែមអំពីសារៈសំខាន់នៃសសរស្តម្ភទី៤របស់ACC ស្តីពីការលើកកម្ពស់វប្បធម៌ ជាមូលដ្ឋាននៃនវានុវត្តភាព ដែលប្រមូលផ្តុំលើមនុស្ស តាមរយៈការប្រើប្រាស់បច្ចេកវិទ្យា និងការលើកកម្ពស់គុណតម្លៃមនុស្ស និងការផ្សារភ្ជាប់មនុស្សជាតិ៕

អត្ថបទ និងរូបភាព ដោយនាយកដ្ឋានព័ត៌មាន