ខេត្តកំពត៖ នាព្រឹកថ្ងៃទី២១ ខែឧសភា ឆ្នាំ២០២៦ ក្រុមការងារអគ្គលេខាធិការដ្ឋានរដ្ឋសភា ដឹកនាំដោយ ឯកឧត្តម ព្រហ្ម វិរៈ អគ្គនាយកនៃអគ្គនាយកដ្ឋានទំនាក់ទំនងអន្តរជាតិ ពិធីការ និងព័ត៌មាន រួមជាមួយតំណាងអង្គការសុខភាពពិភពលោក (WHO) ដឹកនាំដោយ លោកស្រីវេជ្ជបណ្ឌិត ហ្សឺណេវីវ ហូវ (Dr. Genevieve Howe) អ្នកសម្របសម្រួលផ្នែកច្បាប់ និងអភិបាលកិច្ច បានអញ្ជើញចុះពិនិត្យទីតាំងផ្ទាល់នៅមន្ទីរពេទ្យស៊ុនយ៉ាឃៀល និងមណ្ឌលសុខភាពកំពង់គ្រែង ស្ថិតនៅក្រុងបូកគោ ខេត្តកំពត។
ការចុះពិនិត្យនេះ ធ្វើឡើងក្នុងគោលបំណងវាយតម្លៃ និងរៀបចំផែនការត្រៀមលក្ខណៈទទួលគណៈប្រតិភូសមាជិកសភាអន្តរជាតិ មកពីបណ្តាប្រទេសនានាក្នុងតំបន់អាស៊ី-ប៉ាស៊ីហ្វីក ដែលនឹងអញ្ជើញមកចូលរួមក្នុងវេទិកាសមាជិកសភាអាស៊ី-ប៉ាស៊ីហ្វីក ស្តីពីសុខភាពសកល លើកទី៩ (9th APPF-GH)។ ក្នុងអំឡុងពេលនៃកិច្ចប្រជុំនេះ គណៈប្រតិភូនឹងធ្វើទស្សនកិច្ចសិក្សាស្វែងយល់ផ្ទាល់ពីប្រព័ន្ធសុខាភិបាល និងវឌ្ឍនភាពនៃការផ្តល់សេវាថែទាំសុខភាពរបស់ព្រះរាជាណាចក្រកម្ពុជា។
សូមបញ្ជាក់ថា វេទិកាសមាជិកសភាអាស៊ី-ប៉ាស៊ីហ្វីក ស្តីពីសុខភាពសកល លើកទី៩ នេះ នឹងប្រព្រឹត្តទៅចាប់ពីថ្ងៃទី១១ ដល់ថ្ងៃទី១៣ ខែសីហា ឆ្នាំ២០២៦ ខាងមុខ ដោយរដ្ឋសភាកម្ពុជាធ្វើជាម្ចាស់ផ្ទះ៕