ខេត្តកំពត៖ ឯកឧត្តម វ៉ាន់ ដារ៉ា តំណាងរាស្រ្តមណ្ឌលខេត្តកំពត និងជាសមាជិកគណៈកម្មការទី៣ នៃរដ្ឋសភា នាពេលថ្មីៗនេះ បានអញ្ជើញជួបសំណេះសំណាល និងនាំយកអំណោយចែកជូនដល់ប្រជាពលរដ្ឋចំនួន១៥គ្រួសារ នៅឃុំបន្ទាយមាសខាងកើត  ស្រុកបន្ទាយមាស ខេត្តកំពត។ 

ឯកឧត្តម វ៉ាន់ ដារ៉ា បានមានប្រសាសន៍នាំយកនូវការផ្ដាំផ្ញើរសួរសុខទុក្ខ និងក្ដីនឹករលឹកពីថ្នាក់ដឹកនាំកំពូលៗនៃស្ថាប័នជាតិ ជូនដល់បងប្អូនប្រជាពលរដ្ឋ ព្រមទាំងបានកោតសរសើរ និងវាយតម្លៃខ្ពស់ចំពោះថ្នាក់ដឹកនាំគ្រប់លំដាប់ថ្នាក់នៅមូលដ្ឋាន ពិសេសថ្នាក់ដឹកនាំឃុំបន្ទាយមាសខាងកើត ដែលបានយកចិត្តទុកដាក់ចំពោះសុខទុក្ខរបស់បងប្អូនប្រជាពលរដ្ឋនៅក្នុងមូលដ្ឋានរបស់ខ្លួន ធ្វើឱ្យប្រជាពលរដ្ឋទទួលបាននូវភាពកក់ក្ដៅ និងរស់នៅប្រកបដោយភាពសុខដុមរមនា។

នៅក្នុងឱកាសនោះដែរ ឯកឧត្តម វ៉ាន់ ដារ៉ា ក៏បានចែកជូនអំណោយមួយចំនួនដល់ប្រជាពលរដ្ឋចំនួន១៥គ្រួសារ នៅក្នុងឃុំបន្ទាយមាសខាងកើតនេះ និងបានបន្តអញ្ជើញចុះសួរសុខទុក្ខគ្រួសារប្រជាពលរដ្ឋដែលមានពិការភាពចំនួន៣នាក់ ផ្សេងទៀត ដោយឯកឧត្តម បានឧបត្ថម្ភថវិកាជូនក្នុងម្នាក់ៗ ១០ម៉ឺនរៀល និងសម្ភារប្រើប្រាស់មួយចំនួនផងដែរ៕