វិមានរដ្ឋសភា៖ ឯកឧត្តម ព្រហ្ម វិរៈ អគ្គនាយកនៃអគ្គនាយកដ្ឋានទំនាក់ទំនងអន្តរជាតិ ពិធីការ និងព័ត៌មាន នារសៀលថ្ងៃទី២១ ខែមេសា ឆ្នាំ២០២៦ បានអញ្ជើញដឹកនាំកិច្ចប្រជុំផ្ទៃក្នុងអគ្គនាយកដ្ឋាន ដើម្បីពិនិត្យ និងពិភាក្សាលើផែនការកែសម្រួលរចនាសម្ព័ន្ធថ្មីរបស់អង្គភាពចំណុះ ក្នុងគោលដៅបង្កើនប្រសិទ្ធភាពការងារ និងត្រៀមលក្ខណៈសមាហរណកម្មទៅក្នុងប្រព័ន្ធរដ្ឋសភាឌីជីថល (e-Parliament)។

គោលបំណងសំខាន់នៃកិច្ចប្រជុំនេះ គឺដើម្បីជំរុញការរៀបចំរចនាសម្ព័ន្ធរបស់នាយកដ្ឋានទាំង៣នៃអគ្គនាយកដ្ឋាន ឱ្យមានភាពសមស្របទៅនឹងបរិបទការងាររបស់ស្ថាប័ន ពិសេសពង្រឹងតួនាទីជាសេនាធិការជូនអគ្គលេខាធិការដ្ឋានរដ្ឋសភា នៅក្នុងការផ្ដល់សេវាកម្ម និងគាំទ្រដល់បេសកកម្មរបស់សមាជិកសភាឱ្យកាន់តែមានភាពរហ័ស ងាយស្រួល និងទាន់ពេលវេលា ស្របតាមការវិវត្តនៃបច្ចេកវិទ្យាទំនើប។

អង្គប្រជុំ បានធ្វើការពិនិត្យយ៉ាងលម្អិតលើរចនាសម្ព័ន្ធចាស់ និងពិភាក្សាលើសំណើកែសម្រួលរចនាសម្ព័ន្ធថ្មីសម្រាប់នាយកដ្ឋានទាំង៣ ដែលចំណុះឱ្យអគ្គនាយកដ្ឋានទំនាក់ទំនងអន្តរជាតិ ពិធីការ និងព័ត៌មាន។ 

ការរៀបចំជាថ្មីនេះ នឹងក្លាយជាគ្រឹះដ៏សំខាន់ក្នុងការបែងចែកភារកិច្ចឱ្យចំជំនាញ និងពង្រឹងខ្សែចង្វាក់ការងារឱ្យកាន់តែមានសង្គតិភាព ដើម្បីបម្រើផលប្រយោជន៍ ស្ថាប័ននីតិប្បញ្ញត្តិទាំងមូល៕