ខេត្តត្បូងឃ្មុំ៖ ឯកឧត្តម ម៉ូត យូសុះ សមាជិកគណៈកម្មការទី១ នៃរដ្ឋសភា និងជាអ៊ីម៉ាំខេត្តត្បូងឃ្មុំ ថ្មីៗនេះ បានដឹកនាំក្រុមការងារ ចុះជួបសំណេះសំណាល និង នាំយកអំណោយសប្បុរសធម៌ជូនដល់គ្រួសាររងគ្រោះដោយគ្រោះអគ្គិភ័យចំនួន ១០ខ្នងផ្ទះ ស្ថិតនៅភូមិទី៦ ឃុំរកាខ្នុរ ស្រុកក្រូចឆ្មារ។
អមដំណើរក្នុងសកម្មភាពមនុស្សធម៌នេះ រួមមាន៖ ឯកឧត្តម សុះ រ៉ហ្វាត សមាជិកក្រុមប្រឹក្សាខេត្តត្បូងឃ្មុំ ឯកឧត្តម ម៉ាត់ ហ្គោហ្វូត អភិបាលរងនៃគណៈអភិបាល ខេត្តត្បូងឃ្មុំ ព្រមទាំងថ្នាក់ដឹកនាំមូលដ្ឋានជាច្រើនរូបទៀត។
ក្នុងស្មារតីជួយគ្នាក្នុងគ្រាលំបាក ឯកឧត្តម និងក្រុមការងារបាននាំ យកនូវថវិកាសរុបចំនួន ១០,០០០,០០០ (ដប់លាន) រៀលសម្ភារប្រើប្រាស់ និងគ្រឿងឧបភោគបរិភោគចាំបាច់ជាច្រើនទៀតជូនគ្រួសាររងគ្រោះ។
អំណោយទាំងអស់នេះ ត្រូវបានចែកជូនដល់គ្រួសាររងគ្រោះទាំង ១០ខ្នងផ្ទះដើម្បីជួយសម្រាលទុក្ខលំបាក និងដោះស្រាយនូវតម្រូវការចំពោះមុខបានមួយចំណែក។
ឯកឧត្តមក៏បាននាំយកនូវប្រសាសន៍សួរសុខទុក្ខពីថ្នាក់ដឹកនាំរដ្ឋសភាគ្រប់ជាន់ថ្នាក់ និងការចូលរួមសោកស្ដាយយ៉ាងជ្រាលជ្រៅចំពោះគ្រោះថ្នាក់ដែលបានកើតឡើង ដែលបានបង្ហាញពីការយកចិត្តទុកដាក់ខ្ពស់ចំពោះសុខទុក្ខរបស់បងប្អូនប្រជាពលរដ្ឋនៅមូលដ្ឋាន៕