ខេត្តកំពង់ចាម៖ ឯកឧត្តម លន់ លឹមថៃ តំណាងរាស្ត្រមណ្ឌលខេត្តកំពង់ចាម និងជាលេខាធិការគណៈកម្មការទី៣ នៃរដ្ឋសភា នៅព្រឹកថ្ងៃទី១៤ ខែមីនា ឆ្នាំ២០២៦ បានអញ្ជើញចុះពិនិត្យវឌ្ឍនភាពនៃការសាងសង់ព្រះវិហារថ្មីនៅវត្តគង់វង្សរង្សីកោះកុក ស្ថិតក្នុងឃុំកោះទន្ទឹម ស្រុកកំពង់សៀម ខេត្តកំពង់ចាម។
ក្នុងឱកាសចុះពិនិត្យការដ្ឋាននេះ ឯកឧត្តមបានពិនិត្យមើលសកម្មភាពចាក់សាប និងការរៀបចំបរិវេណវត្តឱ្យមានសោភ័ណភាព។ ដើម្បីចូលរួមចំណែកជំរុញការសាងសង់ឱ្យកាន់តែឆាប់រហ័ស ឯកឧត្តម និងក្រុមការងារ បាននាំយកនូវសម្ភារៈសំណង់ និងរុក្ខជាតិលម្អ សរុបជាទឹកប្រាក់ប្រមាណ ១,៥០០ ដុល្លារអាមេរិក ប្រគេនដល់ទីវត្តអារាម រួមមាន៖ ស៊ីម៉ង់ត៍៖ ចំនួន ១០តោន ថ្ម៖ ចំនួន ៣ឡាន កូនឈើ និងដើមផ្កាលម្អ៖ សរុបចំនួន ២០០ដើម (ក្នុងនោះមានដើមផ្កាជើងគោ ១០០ដើម, ផ្កាផួងម៉ាឡៃ ៦០ដើម និងផ្កាចម្រុះពណ៌ចំនួន ៤០ដើមទៀត)។
សកម្មភាពនេះ មិនត្រឹមតែជាការចូលរួមចំណែកលើកកម្ពស់វិស័យព្រះពុទ្ធសាសនា ដែលជាសាសនារបស់រដ្ឋប៉ុណ្ណោះទេ ប៉ុន្តែថែមទាំងជាការបង្កើនគម្របបៃតង និងលើកកម្ពស់សោភ័ណភាពក្នុងទីវត្តអារាមឱ្យកាន់តែស្រស់បំព្រង សម្រាប់ជាទីសក្ការបូជារបស់ពុទ្ធបរិស័ទជិតឆ្ងាយ។