បន្ទាប់ពីកិច្ចប្រជុំគណៈប្រតិភូសភានិយាយភាសាបារាំង លោកជំទាវក៏បានអញ្ជើញចូលរួមក្នុងសិក្ខាសាលាស្ដីពី «ស្ត្រី សន្តិភាព សន្តិសុខ និងស្ថានភាពបន្ទាន់ផ្នែកនយោបាយ» នៅសាលសន្និសីទនៃទីស្នាក់ការកណ្ដាលអង្គការសហប្រជាជាតិ។

ក្នុងវេទិកានេះ លោកជំទាវបានឆ្លុះបញ្ចាំងពីវឌ្ឍនភាពរបស់កម្ពុជា ក្នុងការលើកកម្ពស់សមភាពយេនឌ័រ ដែលជាបុរេលក្ខខណ្ឌសម្រាប់សន្តិសុខជាតិ និងការអភិវឌ្ឍប្រកបដោយចីរភាព។

សូមបញ្ជាក់ថា របៀបវារៈ «ស្ត្រី សន្តិភាព និងសន្តិសុខ» គឺជាក្របខ័ណ្ឌគោលនយោបាយសកលដែលផ្អែកលើសេចក្ដីសម្រេចចិត្តលេខ ១៣២៥ របស់ក្រុមប្រឹក្សាសន្តិសុខអង្គការសហប្រជាជាតិ ក្នុងគោលដៅធានាឱ្យបាននូវការចូលរួមរបស់ស្ត្រី ក្នុងគ្រប់ដំណាក់កាលនៃការកសាងសន្តិភាព, ធានាឱ្យបាននូវការការពារស្ត្រីពីអំពើហិង្សាក្នុងជម្លោះ និងការផ្ដល់សិទ្ធិស្មើគ្នា ក្នុងការចូលរួមដោះស្រាយវិវាទ និងការការពារសិទ្ធិនារីជុំវិញពិភពលោក៕