ខេត្តបន្ទាយមានជ័យ៖ ក្នុងស្មារតីយកចិត្តទុកដាក់ខ្ពស់ចំពោះសុខទុក្ខប្រជាពលរដ្ឋនៅតាមបណ្តោយព្រំដែន ដែលរងផលប៉ះពាល់ពីស្ថានភាពអសន្តិសុខនាពេលកន្លងមក នាព្រឹកថ្ងៃសុក្រទី១៣ ខែមីនា ឆ្នាំ២០២៦ សមាជិករដ្ឋសភា រួមមាន៖ ឯកឧត្តម កែ គឹមយ៉ាន អ្នកតំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ ឯកឧត្តម ច័ន្ទ សុផល អនុប្រធានគណៈកម្មការទី៤ នៃរដ្ឋសភា ឯកឧត្តម ខេង ស៊ុម សមាជិកគណៈកម្មការទី៣ នៃរដ្ឋសភា ឯកឧត្តម សេរី កុសល សមាជិកគណៈកម្មការទី៤ នៃរដ្ឋសភា និងឯកឧត្តម អ៊ី ឡុង សមាជិកគណៈកម្មការទី៦ នៃរដ្ឋសភា បានអញ្ជើញចូលរួមក្នុងពិធីសំណេះសំណាលសួរសុខទុក្ខ និងលើកទឹកចិត្តប្រជាពលរដ្ឋភៀសសឹកដែលកំពុងស្នាក់នៅតាមមណ្ឌលបណ្តោះអាសន្ន ស្ថិតនៅក្នុងវត្តកណ្តោល ភូមិកណ្តោល ឃុំគោករមៀត ស្រុកថ្មពួក និងនៅវត្តចាន់ស៊ី និងវត្តពោធិសុរិយារាម ឃុំកូប ស្រុកអូរ ជ្រៅ ខេត្តបន្ទាយមានជ័យ។
ពិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់ សម្តេចក្រឡាហោម ស ខេង សមាជិកឧត្តមប្រឹក្សាផ្ទាល់ព្រះមហាក្សត្រ និងមានការចូលរួមពី ឯកឧត្តម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ព្រមទាំងតំណាងរាជរដ្ឋាភិបាល និងកងកម្លាំងជាច្រើនរូបក៏មានវត្តមានក្នុងឱកាសនោះដែរ។
កម្មវិធីនេះ ត្រូវបានរៀបចំឡើងនៅបរិវេណសាលាខេត្តបន្ទាយមានជ័យ ក្នុងគោលបំណងសំណេះសំណាលសួរសុខទុក្ខ និងផ្តល់កម្លាំងចិត្តដល់ប្រជាពលរដ្ឋភៀសសឹក ក៏ដូចជាកងកម្លាំងដែលកំពុងបំពេញភារកិច្ចការពារសន្តិសុខនៅតាមតំបន់ជួរមុខ៕