ខេត្តព្រះវិហារ-ឧត្តរមានជ័យ៖ ក្នុងស្មារតីសាមគ្គីភាពរវាងសមរភូមិក្រោយ និងសមរភូមិមុខ កាលពីពេលថ្មីៗនេះ លោកជំទាវ គង់ សាឡន តំណាងរាស្រ្តមណ្ឌលខេត្តព្រៃវែង និងជាសមាជិកាគណៈកម្មការអង្កេត បោសសំអាត និងប្រឆាំងអំពើពុករលួយ នៃរដ្ឋសភា បានដឹកនាំប្រតិភូសប្បុរសជន និងព្រះចៅអធិការវត្តចំនួន៧ ក្នុងខេត្តព្រៃវែងបាននាំយកស្បៀងអាហារ មួយចំនួនធំ ម៉ូតូចំនួន ០៣គ្រឿង និងថវិកាមួយចំនួន ទៅឧបត្ថម្ភកងទ័ពជួរមុខ ចំនួនបួនកន្លែង គឺនៅតំបន់មុំបី បូសស្បូវ តាថាវក្នុងខេត្តព្រះវិហារ និងតំបន់តាក្របី ក្នុងខេត្តឧត្តរមានជ័យ។
នេះគឺជាការបង្ហាញពីការយកចិត្តទុកដាក់ សេចក្តីស្រឡាញ់ និងការដឹងគុណយ៉ាងជ្រាលជ្រៅ ចំពោះពលិកម្មគ្រប់បែបយ៉ាងរបស់បងប្អូនកងទ័ព ដើម្បីការពារសុខសន្តិភាព និងបូរណភាពទឹកដីជូនជាតិមាតុភូមិ។
សកម្មភាពដ៏ថ្លៃថ្លានេះ បានឆ្លុះបញ្ចាំងឱ្យឃើញពីការផ្សារភ្ជាប់គ្នាយ៉ាងជិតស្និទ្ធរវាង "សមរភូមិមុខ និងសមរភូមិក្រោយ" ដែលជាកម្លាំងចលករយ៉ាងសំខាន់ក្នុងការលើកកម្ពស់ស្មារតីស្នេហាជាតិ និងពង្រឹងកម្លាំងការពារជាតិឱ្យកាន់តែរឹងមាំខ្លាំងក្លាថែមទៀត៕