ខេត្តសៀមរាប៖ នៅរាត្រីថ្ងៃទី១៣ ខែមីនា ឆ្នាំ២០២៦ ឯកឧត្តម នូ ផល្លា សមាជិកគណៈកម្មការអង្កេត បោសសំអាត និងប្រឆាំងអំពើពុករលួយ នៃរដ្ឋសភា និងឯកឧត្តម ប៊ុន ថាឫទ្ធិ សមាជិកគណៈកម្មការសិទ្ធិមនុស្ស ទទួលពាក្យបណ្តឹងនិងអង្កេត និងអធិការកិច្ច នៃរដ្ឋសភា និងជាតំណាងរាស្រ្តមណ្ឌលខេត្តសៀមរាប រួមជាមួយលោក លី សារី អភិបាលរងខេត្តសៀមរាប បានអញ្ជើញរៀបចំពិធីជប់លៀងស្វាគមន៍គណៈប្រតិភូអគ្គលេខាធិការរដ្ឋសភា នៃប្រទេសហុងគ្រី ដឹកនាំដោយ ឯកឧត្តមបណ្ឌិត György Such ក្នុងឱកាសបំពេញទស្សនកិច្ចនៅព្រះរាជាណាចក្រកម្ពុជា។
ពិធីនេះបានប្រព្រឹត្តទៅនៅសណ្ឋាគារ Hyatt Regency ក្នុងក្រុងសៀមរាប ក្រោមបរិយាកាសស្និទ្ធស្នាល និងពោរពេញដោយមិត្តភាព។
ក្នុងឱកាសនោះ ភាគីទាំងពីរ បានផ្លាស់ប្តូរយោបល់លើការងារសភា និងការជំរុញកិច្ចសហប្រតិបត្តិការលើវិស័យសំខាន់ៗ ដូចជា វិនិយោគ វប្បធម៌ និងអប់រំ ដើម្បីបន្តពង្រឹងទំនាក់ទំនងទ្វេភាគីរវាងប្រទេសទាំងពីរ។
វត្តមានរបស់គណៈប្រតិភូរដ្ឋសភាហុងគ្រីនៅកម្ពុជានាពេលនេះ ត្រូវបានចាត់ទុកថា ជាសញ្ញាបង្ហាញពីការយកចិត្តទុកដាក់ក្នុងការពង្រឹងចំណងមិត្តភាព និងជំរុញកិច្ចសហប្រតិបត្តិការរវាងកម្ពុជា និងហុងគ្រី ឱ្យកាន់តែរឹងមាំបន្ថែមទៀត៕