ខេត្តសៀមរាប៖ ក្នុងស្មារតីបុរេសកម្ម និងការគិតគូរខ្ពស់បំផុតចំពោះសុខទុក្ខ និងសុវត្ថិភាពរបស់ប្រជាពលរដ្ឋនៅតាមបណ្តោយព្រំដែន ដែលរងផលប៉ះពាល់ពីស្ថានភាពអសន្តិសុខនាពេលកន្លងមក ឯកឧត្តម កែប ជុតិមា ប្រធានគណៈកម្មការទី៤ នៃរដ្ឋសភា និងលោកជំទាវ បានធ្វើកិច្ចសហការ ជាមួយអង្គការ People for Care and Learning (PCL) ចុះបេសកកម្មមនុស្សធម៌ ដើម្បីផ្តល់ជំនួយមនុស្សធម៌ និងលើកទឹកចិត្តដល់ពលរដ្ឋភៀសសឹកដែលកំពុងជួបការលំបាក។
បេសកកម្មមនុស្សធម៌រួមគ្នានេះ ធ្វើឡើងក្រោមការចង្អុលបង្ហាញ និងការអនុញ្ញាតដ៏ខ្ពង់ខ្ពស់ពី សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ដើម្បីឆ្លើយតបទៅនឹងតម្រូវការចាំបាច់ជាក់ស្តែងរបស់បងប្អូនប្រជាពលរដ្ឋ ចំនួន ៤១៤ គ្រួសារ (ស្មើនឹង ១,៣៩៥ នាក់) ដែលកំពុងស្នាក់នៅបណ្តោះអាសន្នក្នុងមណ្ឌលសុវត្ថិភាពវត្តធម្មរង្សី ស្ថិតក្នុងស្រុកក្រឡាញ់ ខេត្តសៀមរាប បន្ទាប់ពីលំនៅឋានរបស់ពួកគាត់រងការគំរាមកំហែង និងខូចខាតពីការរំលោភបំពានលើបូរណភាពទឹកដីពីសំណាក់ភាគីថៃ។
ក្នុងឱកាសសំណេះសំណាលប្រកបដោយមនោសញ្ចេតនាជ្រាលជ្រៅនេះ ឯកឧត្តម កែប ជុតិមា បាននាំនូវសេចក្តីនឹករលឹក និងការគិតគូរជានិច្ចពីសុខទុក្ខរបស់ថ្នាក់ដឹកនាំកំពូលនៃជាតិ រួមមាន សម្តេចតេជោ ហ៊ុន សែន ប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា, សម្តេចប្រធានរដ្ឋសភា និង សម្តេចធិបតី នាយករដ្ឋមន្ត្រី ដែលជានិច្ចកាលតែងតែនៅក្បែរប្រជាពលរដ្ឋគ្រប់កាលៈទេសៈ ជាពិសេសក្នុងកិច្ចការពារអធិបតេយ្យជាតិ និងការធានាសុខុមាលភាពជូនពលរដ្ឋនៅតំបន់ជួរមុខឱ្យបានរឹងមាំ។
តាមរយៈកិច្ចសហការយ៉ាងស្អិតរមួតជាមួយលោក Travis Johnson Christian នាយកប្រតិបត្តិអង្គការ PCL ជំនួយមនុស្សធម៌ជាច្រើនសន្ធឹកសន្ធាប់ រួមមាន ស្បៀងអាហារ គ្រឿងឧបភោគបរិភោគចាំបាច់ និងថវិកាឧបត្ថម្ភ ត្រូវបានចាត់ចែងចែកចាយដល់ដៃគ្រួសារនីមួយៗ ដើម្បីសម្រាលបន្ទុកជីវភាពប្រចាំថ្ងៃ។ បន្ថែមពីនេះ ឯកឧត្តមក៏បានផ្តល់ការឧបត្ថម្ភ និងការគាំទ្រយ៉ាងសកម្មដល់កងកម្លាំងការពារព្រំដែន ក្រុមគ្រូពេទ្យ និងអាជ្ញាធរមូលដ្ឋាន ដែលកំពុងបំពេញភារកិច្ចការពារ និងថែទាំពលរដ្ឋយ៉ាងយកចិត្តទុកដាក់បំផុត។
បច្ចុប្បន្ន អាជ្ញាធរពាក់ព័ន្ធ និងកងកម្លាំងសមត្ថកិច្ច កំពុងបន្តតាមដានស្ថានភាពយ៉ាងហ្មត់ចត់ ដើម្បីធានាថាពលរដ្ឋភៀសសឹកទាំងអស់ ទទួលបាននូវការគាំទ្រទាំងស្មារតី និងសម្ភារៈ រហូតដល់ស្ថានភាពមានសុវត្ថិភាពពេញលេញ ដែលអាចឱ្យពួកគាត់វិលត្រឡប់ទៅកាន់លំនៅឋាន និងប្រកបរបរចិញ្ចឹមជីវិតជាប្រក្រតីឡើងវិញ៕