វិមានរដ្ឋសភា៖ គណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា ដឹកនាំដោយ លោកជំទាវ និន សាផុន ប្រធានគណៈកម្មការ នាព្រឹកថ្ងៃទី១១ ខែមីនា ឆ្នាំ២០២៦ នេះ បានបេីកកិច្ចប្រជុំផ្ទៃក្នុងគណៈកម្មការ ដេីម្បីពិនិត្យលេីការងាររៀបចំសិក្ខាសាលាស្តីពី ការពង្រឹងភាពធន់ជាតិ និងកាលានុវត្តភាពនៃយុទ្ធសាស្ត្រអភិបាលកិច្ចវិទ្យាសាស្ត្រ បច្ចេកវិទ្យា នវានុវត្តន៍ ឧស្សាហកម្ម និងពាណិជ្ជកម្មកម្ពុជា ដែលនឹងប្រព្រឹត្តទៅនៅព្រឹកថ្ងៃទី១២ ខែមីនា ឆ្នាំ២០២៦ ស្អែកនេះ ក្រោមអធិបតីភាពដ៏ខ្ពង់ខ្ពស់អញ្ជើញបេីកអង្គសិក្ខាសាលាដោយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា។
គោលបំណងនៃការរៀបចំសិក្ខាសាលា គឺផ្តោតសំខាន់ចំនួនពីរជាចម្បង៖
ទី១-ដើម្បីទទួលបាននូវព័ត៌មានដោយផ្ទាល់ជាប្រយោជន៍ និងជាមូលដ្ឋានសម្រាប់បំពេញមុខងារ និងតួនាទីស្នូលទាំងបីរបស់សភាគឺ៖ តួនាទីនីតិកម្ម តួនាទីតាមដានការអនុវត្តច្បាប់ និងតួនាទីភាពជាតំណាង ឱ្យបានកាន់តែល្អប្រសើរ និងមានប្រសិទ្ធភាពខ្ពស់ថែមទៀត និង
ទី២-ដើម្បីពង្រឹងកិច្ចសហការរវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិ ក្នុងការជួយជំរុញការអនុវត្តយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល (ឆ្ពោះទៅសម្រេចចក្ខុវិស័យកម្ពុជាឆ្នាំ២០៣០ និងឆ្នាំ២០៥០) ឱ្យទទួលបានជោគជ័យ និងប្រសិទ្ធភាពខ្ពស់ ៕