ខេត្តកំពង់ចាម៖ ក្នុងក្របខណ្ឌនៃសកម្មភាពចុះមូលដ្ឋានដើម្បីស្វែងយល់ពីសុខទុក្ខ និងតម្រូវការរបស់ប្រជាពលរដ្ឋ លោកជំទាវ កុល ធារិន សមាជិកាគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា និងជាតំណាងរាស្ត្រមណ្ឌលខេត្តកំពង់ចាម បានអញ្ជើញចុះជួបសំណេះសំណាល និងចែកអំណោយសប្បុរសធម៌ជូនគ្រួសារប្រជាពលរដ្ឋចំនួន ៣៨០គ្រួសារ ស្ថិតក្នុងឃុំព្រែកកក់ ស្រុកស្ទឹងត្រង់ កាលពីរសៀលថ្ងៃព្រហស្បតិ៍ ទី១២ ខែកុម្ភៈ ឆ្នាំ២០២៦។
ក្នុងឱកាសនោះ លោកជំទាវតំណាងរាស្ត្រ បាននាំយកនូវចង្ក្រានសន្សំសំចៃ ដែលជាអំណោយដ៏ថ្លៃថ្លារបស់ សម្ដេចកិត្តិសង្គហបណ្ឌិត ម៉ែន សំអន ឧត្ដមប្រឹក្សាផ្ទាល់ព្រះមហាក្សត្រ និងជាប្រធានសមាគមនារីកម្ពុជាដើម្បីសន្តិភាពនិងអភិវឌ្ឍន៍។
ការចែកជូនចង្ក្រានសន្សំសំចៃនេះ មិនត្រឹមតែជាការជួយសម្រាលបន្ទុកជីវភាពប៉ុណ្ណោះទេ ប៉ុន្តែថែមទាំងជួយជំរុញដល់ការប្រើប្រាស់ថាមពលប្រកបដោយប្រសិទ្ធភាព និងកាត់បន្ថយការប្រើប្រាស់ឈើអុស ដែលជាផ្នែកមួយនៃការការពារបរិស្ថាន។
សកម្មភាពគាំទ្រ និងការឧបត្ថម្ភដល់មូលដ្ឋាន ក្រៅពីការចែកជូនចង្ក្រាន លោកជំទាវ កុល ធារិន ក៏បានឧបត្ថម្ភបន្ថែមនូវសម្ភារប្រើប្រាស់ និងថវិកាលើកទឹកចិត្តដល់កម្លាំងការពារក្នុងតំបន់ រួមមាន៖ប្រជាពលរដ្ឋ ៣៨០នាក់៖ ម្នាក់ៗទទួលបានសារុងចំនួន ១, កម្លាំងប្រជាការពារ ១០នាក់៖ ម្នាក់ៗទទួលបានសារុង ១ និងថវិកាចំនួន ២០,០០០រៀល។ សរុបថវិកាឧបត្ថម្ភ៖ ២,២០០,០០០រៀល។
វត្តមានរបស់លោកជំទាវសមាជិការដ្ឋសភានៅពេលនេះ បានបង្ហាញឱ្យឃើញពីការយកចិត្តទុកដាក់ខ្ពស់របស់រដ្ឋសភា ក្រោមការគិតគូរយកចិត្តទុកដាក់ខ្ពស់របស់ សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ចំពោះជីវភាពរស់នៅរបស់ប្រជាពលរដ្ឋនៅតាមមូលដ្ឋានដាច់ស្រយាល។
នេះគឺជាបេសកកម្មសំខាន់មួយរបស់តំណាងរាស្ត្រ ក្នុងការផ្សារភ្ជាប់ទំនាក់ទំនងរវាងស្ថាប័ននីតិប្បញ្ញត្តិ និងប្រជាពលរដ្ឋនៅមូលដ្ឋាន ដើម្បីទទួលយកសំណូមពរ និងពិនិត្យមើលស្ថានភាពជាក់ស្ដែងនៃការអភិវឌ្ឍក្នុងសហគមន៍។
ក្នុងពិធីនេះក៏មានការអមដំណើរដោយ លោក អៀង ថៃហុង អភិបាលរងនៃគណៈអភិបាលស្រុកស្ទឹងត្រង់ ព្រមទាំងអាជ្ញាធរមូលដ្ឋានពាក់ព័ន្ធជាច្រើនរូបទៀតផងដែរ៕