ឯកឧត្តម កៃ កេតនិន អគ្គនាយកនៃអគ្គនាយកដ្ឋាននីតិកម្ម និងស្រាវជ្រាវ នាព្រឹកថ្ងៃទី១២ ខែកុម្ភៈ ឆ្នាំ២០២៦ បានអញ្ជើញដឹកនាំកិច្ចប្រជុំពិនិត្យ និងសិក្សាអំពីរចនាសម្ព័ន្ធ តួនាទី និងភារកិច្ចរបស់អគ្គនាយកដ្ឋាននីតិកម្ម និងស្រាវជ្រាវ។ កិច្ចប្រជុំនេះ មានការអញ្ចើញចូលរួមពីសំណាក់លោក អគ្គនាយករង ប្រធាននាយកដ្ឋាន និងអនុប្រធាននាយកដ្ឋាន។

ឯកឧត្តម កៃ កេតនិន បានមានប្រសាសន៍ថា គោលបំណងនៃការវិភាគអំពីរចនាសម្ព័ន្ធ និងមុខងាររបស់អគ្គនាយកដ្ឋាននីតិកម្ម និងស្រាវជ្រាវ ដើម្បីត្រៀមខ្លួនក្នុងការចូលរួមអនុវត្តគោលការណ៍កែសម្រួលរចនាសម្ព័ន្ធរបស់អគ្គលេខាធិការដ្ឋានរដ្ឋសភា ដែលសមស្របទៅតាមការវិវឌ្ឍរីកចម្រើនរបស់រដ្ឋសភានៃព្រះរាជាណាចក្រកម្ពុជា។

ក្នុងឱកាសនោះ ឯកឧត្តម បានសង្កត់ធ្ងន់ថា កិច្ចប្រជុំនេះ ផ្តោតទៅលើការពិនិត្យ និងកែសម្រួលរចនាសម្ព័ន្ធអគ្គនាយកដ្ឋាននីតិកម្ម និងស្រាវជ្រាវ នៃអគ្គលេខាធិការដ្ឋានរដ្ឋសភា ដើម្បីបង្កើតអង្គភាពថ្មីមួយ ដែលអាចពង្រឹងសមត្ថភាពស្រាវជ្រាវ គាំទ្រការងារគណៈកម្មការ និងអភិវឌ្ឍធនធានមនុស្សឱ្យកាន់តែមានប្រសិទ្ធភាពខ្ពស់។

ជាមួយគ្នានេះដែរ ឯកឧត្តម បានណែនាំឱ្យរៀបចំកិច្ចប្រជុំត្រួតពិនិត្យការងារជាប្រចាំ ដើម្បីធានាថាការអនុវត្តភារកិច្ចទទួលបានលទ្ធផលប្រកបដោយប្រសិទ្ធភាព និងប្រសិទ្ធផលជាក់ស្តែង៕