ក្នុងគោលដៅបង្កើនប្រសិទ្ធភាពការងារការទូតសភា និងលំហូរព័ត៌មានឱ្យមានប្រសិទ្ធភាព អគ្គលេខាធិការដ្ឋានរដ្ឋសភា បានរៀបចំពិធីផ្សព្វផ្សាយសេចក្តីសម្រេច និងលិខិតចាត់តាំងថ្មីដល់មន្ត្រីបង្គោលនៃអគ្គនាយកដ្ឋានទំនាក់ទំនងអន្តរជាតិ ពិធីការ និងព័ត៌មាន (ទពព) ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត កែវ ពិសិដ្ឋ។
នៅក្នុងពិធីដែលបានប្រារព្ធធ្វើនាព្រឹកថ្ងៃទី៩ ខែកុម្ភៈ ឆ្នាំ២០២៦ ឯកឧត្តមបណ្ឌិត កែវ ពិសិដ្ឋ អគ្គលេខាធិការរងប្រចាំការរដ្ឋសភា នាយកខុទ្ទកាល័យ និងជាអ្នកគ្រប់គ្រងផ្ទាល់លើការងារ (ទពព) បាន ធ្វើការណែនាំឱ្យគ្រប់នាយកដ្ឋានចំណុះ ត្រូវពិនិត្យឡើងវិញនូវរចនាសម្ព័ន្ធការងារ ដើម្បីធានាថា រាល់ភារកិច្ចត្រូវបានអនុវត្តដោយរលូននិងគ្មានការរាំងស្ទះ ។
ជាមួយគ្នានេះ សម្រាប់មន្ត្រីដែលទើបទទួលបានការចាត់តាំងថ្មី ឯកឧត្តមបានដាស់តឿនឱ្យសិក្សា និងក្តាប់ឱ្យជាប់នូវសេចក្តីសម្រេចស្តីពីតួនាទី និងភារកិច្ចរបស់ខ្លួន ដើម្បីក្លាយជាកម្លាំងចលករដ៏សកម្មក្នុងការបម្រើស្ថាប័ននីតិប្បញ្ញត្តិ។
ដើម្បីបន្តលើកកម្ពស់ស័ក្តិសិទ្ធិភាពការងារ ឯកឧត្តមបណ្ឌិត កែវ ពិសិដ្ឋ អគ្គលេខាធិការរងប្រចាំការរដ្ឋសភាក៏បានផ្តល់នូវអនុសាសន៍គន្លឹះសំខាន់ៗជាច្រើនក្នុងន័យលើកទឹកចិត្ត តម្រង់ទិសដល់មន្ត្រី អគ្គនាយកដ្ឋាន ដើម្បីធានាថាការងារទំនាក់ទំនងអន្តរជាតិ ពិធីការ និងការផ្សព្វផ្សាយព័ត៌មានរបស់រដ្ឋសភា ដើរស្របតាមចក្ខុវិស័យដឹកនាំរបស់សម្តេចប្រធានរដ្ឋសភា ដោយមន្ត្រីម្នាក់ៗត្រូវខិតខំ បំពេញការងារដោយផ្អែកលើលទ្ធផលជាក់ស្តែង ភាពស្មោះត្រង់និងការទទួលខុសត្រូវខ្ពស់បំផុតចំពោះមុខស្ថាប័នផងដែរ។
ឯកឧត្តមបណ្ឌិត កែវ ពិសិដ្ឋ បានសង្កត់ធ្ងន់ថា "មន្ត្រីត្រូវចូលរួមយ៉ាងសកម្មក្នុងនាមជាម្ចាស់ការ ដើម្បីជួយដល់ស្ថាប័នរដ្ឋសភាឱ្យកាន់តែរឹងមាំ និងមានមុខមាត់ខ្ពស់លើឆាកអន្តរជាតិ"។
គួររំលឹកដែរថា ពិធីផ្សព្វផ្សាយសេចក្តីសម្រេច និងលិខិតចាត់តាំងថ្មីដល់មន្ត្រីបង្គោលនៃអគ្គនាយកដ្ឋានទំនាក់ទំនងអន្តរជាតិ ពិធីការ និងព័ត៌មាន ដែលរៀបចំធ្វើនៅថ្ងៃនេះ មិនត្រឹមតែជាការប្រកាសមុខតំណែងប៉ុណ្ណោះទេ ប៉ុន្តែគឺជាការផ្ដល់ទំនុកចិត្តនិងការរំលឹកស្មារតីដល់មន្ត្រីរាជការទាំងអស់ឱ្យបន្តខិតខំប្រឹងប្រែងអភិវឌ្ឍសមត្ថភាពដើម្បីឆ្លើយតបទៅនឹងតម្រូវការការងារក្នុងបរិបទថ្មីនៃរដ្ឋសភាអាណត្តិទី៧នេះផងដែរ៕
