ឯកឧត្តម ប៉ាន សូរស័ក្តិ លេខាធិការគណៈកម្មការទី៩ នៃរដ្ឋសភា និងជាប្រធានសហព័ន្ធកីឡាទោចក្រយានកម្ពុជា បានអញ្ជើញជាអធិបតីក្នុង​ពិធីបិទ​ការប្រកួតកីឡា​ទោចក្រយាន ជ្រើសរើសជើងឯកថ្នាក់ជាតិឆ្នាំ២០២៥ នៅពហុកីឡដ្ឋានមរតកតេជោ នាថ្ងៃទី៨ ខែកុម្ភៈ ឆ្នាំ២០២៦។

ការប្រកួតកីឡាទោចក្រយាន ជ្រើសរើសជើងឯកថ្នាក់ជាតិឆ្នាំ២០២៥ បានបញ្ចប់ដោយជោគជ័យ ក្រោយដំណើរការប្រកួតរយៈពេល ២ថ្ងៃ នៅថ្ងៃទី៧ និងទី៨ ខែកុម្ភៈ ឆ្នាំ២០២៦ លើវិញ្ញាសាចំនួន ៧ប្រភេទ ដូចជា៖ វិញ្ញាសាកង់ភ្នំបុរស ៧ជុំ, វិញ្ញាសាកង់ភ្នំបុរស ៥ជុំ, វិញ្ញាសាកង់ភ្នំ ៤ជុំបុរស, វិញ្ញាសាកង់ភ្នំនារី ៣ជុំ, វិញ្ញាសាកង់គួកបុរស ១០ជុំ, វិញ្ញាសា​កង់គួកបុរស ៨ជុំ និងវិញ្ញាសាកង់គួកបុរស ១២ជុំ។

បើយោងតាមអគ្គលេខាធិការដ្ឋានសហព័ន្ធកីឡាទោចក្រយានកម្ពុជា ការប្រកួតជ្រើសរើសជើងឯកថ្នាក់ជាតិ ឆ្នាំ២០២៥ មានអត្ដពលិកចូលរួមចំនួន ១១០នាក់ និងរៀបចំឡើង​ដើម្បី​វាស់ស្ទង់ និងវាយតម្លៃលើសមត្ថភាពគណៈកម្មការបច្ចេទេស និងវាស់ស្ទង់សមត្ថភាពកីឡាករ-កីឡាការិនី ក្រោយទទួលបានការហ្វឹកហាត់កន្លងមក។

ភ្ជាប់ជាមួយការប្រកួតជើងឯកប្រចាំឆ្នាំនេះ ថ្នាក់ដឹកនាំសហព័ន្ធកីឡាទោចក្រយានកម្ពុជា ក៏បានផ្ដួចផ្ដើមបង្កើតឲ្យមានមូលនិធិ សម្រាប់គាំទ្រជួយដល់ជនភៀសសឹក និងវីរៈកងទ័ពនៅព្រំដែន ផងដែរ៕