បន្ទាប់បានបំពេញបេសកកម្ម នៅខេត្តកំពង់ចាម ត្បូងឃ្មុំ និងខេត្តស្វាយរៀង រួចមកនេះ គណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃរដ្ឋសភា ដឹកនាំដោយ ឯកឧត្តម ប៉ា សុជាតិវង្ស ប្រធានគណៈកម្មការ រួមជាមួយតំណាងរាស្ត្រមណ្ឌលខេត្តព្រៃវែង បានអញ្ជើញដល់ខេត្តព្រៃវែង។
 
នៅព្រឹកថ្ងៃទី២៤ ខែមករា ឆ្នាំ២០២៥ បានអញ្ជើញចុះជួបប្រជុំការងារជាមួយថ្នាក់ដឹកនាំរដ្ឋបាលខេត្តព្រៃវែង ដឹកនាំដោយ ឯកឧត្តម ស្បោង សារ៉ាត ប្រធានក្រុមប្រឹក្សាខេត្ត និងឯកឧត្តម អន ភារៈ អភិបាលរងខេត្ដ ដើម្បីស្វែងយល់ពីស្ថានភាពទូទៅរបស់ខេត្ត និងរបាយការណ៍វឌ្ឍនភាពការងារ បញ្ហាប្រឈម ក៏ដូចជាទិសដៅការងារពាក់ព័ន្ធនឹងវិស័យទាំង៤ក្នុងក្របខ័ណ្ឌទទួលខុសត្រូវរបស់គណៈកម្មការ រួមមាន៖ វិស័យអប់រំ សាសនា វប្បធម៌ និងវិស័យទេសចរណ៍។